Արցախում ժամկետային զինծառայող է մահացել: 20-ամյա Հովսեփ Գրիգորյանի դին հայտնաբերվել է ճակատի շրջանում հրազենային վիրավորումով: Նախնական տվյալներով՝ Գրիգորյանը մահացել է ծառայակցի կողմից արձակված կրակոցից. վերջինը խախտել է զենքի հետ վարվելու կանոնները: Քրեական գործ է հարուցվել, մահացածի ծառայակիցը ձերբակալված է: Նշենք, որ Հովսեփ Գրիգորյանը բնակվել է Ռուսաստանում, Հայաստան էր եկել՝ զինծառայության մեկնելու: Նա բանակ էր զորակոչվել 2017 թվականի ամռանը:
Հայաստանի եւ Արցախի նախագահներն ու կառավարության անդամները երեկ վաղ առավոտյան «Եռաբլուր»-ում էին. հունվարի 28-ին Հայոց բանակի կազմավորման 26-ամյակն էր: Վարչապետ Կարեն Կարապետյանն ու կառավարության պանթեոն են ժամանել միկրոավտոբուսներով: Ո՞ւր են նրանց շքեղ ավտոմեքենաները. հարցը գործադիրի անդամներն անպատասխան են թողել: Կարեն Կարապետյանը նշել է միայն, որ նման արարողակարգ է սահմանվել: Ի դեպ, առաջին անգամ Սերժ Սարգսյանը ելույթ է ունեցել «Եռաբլուր»-ում՝ շնորհավորելով բանակի օրվա առիթով: Նախագահը նաեւ հետմահու պարգեւատրել է զոհված զինծառայողներին՝ պարգեւները հանձնելով նրանց ընտանիքների անդամներին:
ՀՀԿ-ի նախագահի թեկնածու Արմեն Սարգսյանն այսօր հանդիպել է հանրապետականների հետ: Իշխող կուսակցության գրասենյակում անցկացված հանդիպումը փակ է եղել լրատվամիջոցների համար: Հավաքից հետո Արմեն Սարգսյանը լրագրողներին ասել է, որ սա քաղաքական ուժերի հետ հանդիպումների շարքից էր, իսկ նախագահի թեկնածու առաջադրվելու՝ ՀՀԿ-ի առաջարկին վերջնական պատասխան կտա մի քանի այլ հանդիպումներից հետո միայն: Սարգսյանն այսօր հանդիպել է նաեւ Դաշնակցության ներկայացուցիչներին: Խորհրդարանական մյուս ուժերից «Ելք»-ի հետ Հանրապետականի նախագահի թեկնածուն կհանդիպի հաջորդ շաբաթ, իսկ «Ծառուկյան» դաշինքի հետ հանդիպման մասին որեւէ տեղեկատվություն այս պահին հայտնի չէ:
Եվրոպական երկրների կողմից Հայաստան-Եվրամիություն համաձայնագրի վավերացման գործընթացը կսկսվի մայիսի կամ հունիսի 1-ից: Արտգործնախարարության 2017 թվականի գործունեության ամփոփիչ ասուլիսում Էդվարդ Նալբանդյանը նաեւ ասել է, որ Հայաստանը վավերացմանն ուղղված քայլեր կանի մինչեւ ապրիլ:
Ղարաբաղյան հակամարտության կարգավորման հարցով բանակցություններն անցյալ տարի շարունակվեցին. հանդիպեցին նաեւ նախագահները: Առաջընթաց, սակայն, դեռեւս չկա: Այս տարվա առաջին՝ Կրակովում կայացած հանդիպմանն էլ քննարկվել է Կասպրշիկի թիմի ընդլայնման հնարավորությունը: Նալբանդյանը հույս ունի, որ գոնե այս անգամ Բաքուն չի խախտի պայմանավորվածությունը: Արցախից բացի՝ Ադրբեջանի նախագահը պարբերաբար խոսում է նաեւ Երեւանի տարածքային պատկանելության մասին: Նալբանդյանն առաջարկում է Իլհամ Ալիեւին հրավիրել Էրեբունի-Երեւանի 2800-ամյակի տոնակատարություններին. թող գա, տեղում համոզվի:
Ռուսաստանում օրերս ստորագրահավաք է սկսվել. պահանջում են հանել Երեւանում տեղադրված Գարեգին Նժգեհի արձանը՝ պատճառաբանելով ֆաշիզմի հերոսացման եւ նեոնացիզմի վերածնման դեմ պայքարով: Նախարարը սա մեր հակառակորդների շահարկում է որակում: Էդվարդ Նալբանդյանը նաեւ եւս մեկ անգամ հաստատել է. «Ռոբսոն» մականունով հայտնի Ռուբեն Թաթուլյանը, որի անունը կապվում է քրեական շրջանակների հետ, եղել է իր խորհրդականը: Նախարարը, սակայն, չի պատասխանել հարցին, թե ի՞նչ խորհուրդներ է տվել Թաթուլյանը:
Էներգետիկ ենթակառուցվածքների եւ բնական պաշարների նախարարը կշարունակի պաշտոնավարել: Աշոտ Մանուկյանը հրաժարականի դիմում ներկայացնելուց հետո հանդիպել է նախագահին եւ վարչապետին, ու փոխել միտքը: Մանուկյանի մամուլի խոսնակն ասել է՝ նախարարը հրաժարականի դիմում էր ներկայացրել անձնական պատճառներով, բայց «հիմա հարցը հանվել է օրակարգից»: Խոսնակը, սակայն, չի նշել, թե ինչ պատճառների մասին է խոսքը:
Նախօրեին Արա լեռան վրա ողբերգական դեպք է տեղի ունեցել. արշավի մեկնած 18 հոգանոց խումբը հայտնվել է ձնաբքի մեջ: Պատահարի հետեւանքով խմբի անդամներից 33-ամյա Նաիրուհի Սիմոնյանը մահացել է. նա Ալավերդիից էր, լեռնագնաց էր եւ զբոսավար: Խմբից 2 տղամարդ էլ վնասվածքներով հիվանդանոց է տեղափոխվել: Նրանցից Էդգար Նավասարդյանը՝ խմբի ղեկավարը, բազմաթիվ կոտրվածքներ ունի: 38-ամյա տղամարդն առաջիկայում 3 բարդ վիրահատության է ենթարկվելու: Նրան օգնելու համար ընկերներն արդեն դրամահավաք են նախաձեռնել:
Մյուս տուժածը՝ 22-ամյա Հրաչյա Հարությունյանը, թեթեւ վնասվածք է ստացել եւ այսօր արդեն դուրս գրվել հիվանդանոցից: Իսկ Արտակարգ իրավիճակների նախարարությունն այսօր մանրամասներ է հայտնել կատարվածի վերաբերյալ: Մասնագետներն ասում են՝ Ծաղկեվանքի տարածքը, որտեղ տեղի է ունեցել ողբերգությունը, ամենավտանգավոր հատվածն է, քանի որ կանաչապատ լանջերից հետո կտրուկ իջվածք է սկսվում: Դեպքի պահին ձնահյուսի առաջին հարվածին ենթարկվել է Էդգար Նավասարդյանը. լեռնագնացն ու եւս 6 արշավական շուրջ 30-40 մետր ցած են գլորվել:
Նյու Յորքում կայացել է «Գրեմմի» մրցանակաբաշխության հոբելյանական` 60-րդ արարողությունը: Այս տարի «Գրեմմի»-ի էին առաջադրվել նաեւ Տիգրան Մանսուրյանը եւ Կոնստանտին Օրբելյանը: Նրանք, սակայն, չեն հաղթել: Ամենաշատ արձանիկները ստացել է Բրունո Մարսը. երաժիշտը հաղթել է առաջադրված բոլոր 7 անվանակարգերում: Քենդրիկ Լամարը հաղթող է ճանաչվել 5 անվանակարգում, իսկ գլխավոր մրցանակներից մեկը ստացած միակ կինը կանադացի Ալիսիա Քարան է: Կոմպոզիտոր Ռենդի Նյումանը «Գրեմմի» է ստացել Պուտինի մասին երգի համար. նա հաղթել է «Լավագույն գործիքավորում» անվանակարգում: Մի քանի անվանակարգում առաջադրվել էին նաեւ Լեդի Գագան ու Jay Z-ն, սակայն ոչ մեկում չեն կարողացել հաղթել: Ռեփերի կինը, ի դեպ, միջոցառմանը ներկայացել է 6.8 մլն դոլար արժողությամբ զարդերով:
Կայացել է «Եվրատեսիլ 2018»-ի վիճակահանությունը, որի արդյունքում պարզ է դարձել, թե մասնակից երկրների ներկայացուցիչները ո՞ր կիսաեզրափակիչներում են ելույթ ունենալու: Վիճակահանության արդյունքով՝ Հայաստանի ներկայացուցիչը հանդես կգա առաջին կիսաեզրափակիչում: «Եվրատեսիլ 2018»-ը տեղի կունենա Պորտուգալիայի մայրաքաղաք Լիսաբոնում. անցյալ տարվա մրցույթի հաղթողն այս երկրի ներկայացուցիչ Սալվադոր Սոբրալն է: Կիսաեզրափակիչ փուլերը մայիսի 8-ին եւ 10-ին են, իսկ եզրափակիչը նախանշված է մայիսի 12-ին: Հավելենք, որ «Եվրատեսիլ 2018»-ի նախորդ տարվա հաղթողի եւ մրցույթի Մեծ հնգյակի ներկայացուցիչները ելույթ են ունենալու միայն եզրափակիչում:
Հունվարի 29-ին դոլարը փոքր-ինչ թանկացել է, եվրոն ու ռուբլին՝ էժանացել: Դոլարի փոխարժեքը կազմել է 480 դրամ, եվրոյինը՝ 596, ռուբլունը՝ 8 դրամ 54 լումա, ֆունտինը՝ 677 դրամ:
Հունվարի 30-ի ցերեկն ու 31-ին հանրապետությունում սպասվում է առանց տեղումների եղանակ, 30-ի գիշերն առանձին շրջաններում հնարավոր է թույլ ձյուն: Օդի ջերմաստիճանը հունվարի 30-ից փետրվարի 3-ը 8-10 աստիճանով կբարձրանա: Երեւանում նույնպես հունվարի 30-ի ցերեկը տեղումներ չեն սպասվում, գիշերը հնարավոր է թույլ ձյուն: Մայրաքաղաքում գիշերը կդիտվի -1-3, ցերեկը՝ +5+7 աստիճան տաքություն:
