ՀՀԿ-ի կողմից երկրի նախագահ առաջադրվելու առաջարկություն ստացած Արմեն Սարգսյանը ԵՊՀ գիտխորհրդի կազմի հետ հանդիպմանը կարեւորել է քաղաքական ուժեղ համակարգի, տնտեսության զարգացման եւ առողջ հասարակության ստեղծումը: Այս մասին այսօր՝ հունվարի 31-ին, հանդիպումից հետո լրագրողների հետ զրույցում ասել է ԵՊՀ ռեկտոր Արամ Սիմոնյանը. «Նա նշեց, որ 21-րդ դարում ուժեղ Հայաստան ունենալու համար պետք է ամենօրյա դժվարին աշխատանք ոչ միայն տնտեսության ոլորտում, այլ անհրաժեշտ է ստեղծել քաղաքական ուժեղ համակարգ, առողջ հասարակություն: Նա նաեւ գովեստով խոսեց մեր արտաքին քաղաքականության մասին»:
Թե ինչու հանդիպման ժամանակ լրատվամիջոցների ներկայացուցիչներին ԵՊՀ անվտանգության աշխատակիցները թույլ չեն տվել մտնել ԵՊՀ շենք, Արամ Սիմոնյանը նշեց. «Զարմանալի բան եք ասում, որովհետեւ ոչ ոք ոչ մեկի նման բան չի արտոնել: Արմեն Սարգսյանի խնդրանք էր ուղղակի հնարավորություն տալ այսօր հարցազրույց չտալ»:
Նշենք, որ Արմեն Սարգսյանն այսօր լրագրողների հետ հանդիպումից խուսափեց. նա ԵՊՀ շենք եկավ հայտարարված ժամից շուտ եւ դուրս եկավ ետնամուտքով: Չնայած ի սկզբանե ասված էր, որ համալսարականների հետ հանդիպումը փակ է լինելու, սակայն, կազմակերպիչները թույլ էին տվել հանդիպմանը մասնակցել երկու լրատվամիջոցի՝ մյուսների մուտքը արգելելով ԵՊՀ շենք: ԵՊՀ լրատվական ծառայության ղեկավար Կարեն Գրիգորյանը լրագրողների հետ զրույցում նշեց, որ քննարկմանը լրատվամիջոցների մասնակցության հարցի հետ ԵՊՀ-ն որեւիցե առնչություն չի ունեցել եւ թե ինչպես է որոշվել փակ հանդիպմանը թույլ տալ երկու լրատվամիջոցի մասնակցությունը՝ տեղեկություններ չունի:
