ՀՀԿ-ի նախագահի թեկնածու Արմեն Սարգսյանն այսօր հանդիպումների շարքը շարունակել է ԵՊՀ-ում: Ի տարբերություն նախորդ հանդիպումների՝ այս անգամ նա խուսափել է լրագրողների հետ զրույցից. Սարգսյանը համալսարան է գնացել հայտարարված ժամից շուտ եւ շենքից դուրս եկել հետնամունքով: Համալսարանից ասել են, որ հանդիպմանը լրատվամիջոցների մասնակցության հարցն իրենց հետ չեն քննարկել եւ տեղյակ չեն, թե ինչու է որոշվել նախապես փակ հայտարարված հանդիպմանը, ամեն դեպքում, երկու լրատվամիջոցի թույլ տալ մասնակցել: Ի դեպ, ԵՊՀ անվտանգության աշխատակիցները լրագրողներին թույլ չեն տվել նույնիսկ համալսարանի շենք մտնել: Ռեկտոր Արամ Սիմոնյանը, կարծես, զարմացած է. ասել է՝ ինքը ոչ ոքի նման բան չի կարգադրել: Սիմոնյանը, այնուամենայնիվ, անկեղծացել է՝ խոստովանելով, որ Արմեն Սարգսյանը խնդրել էր հնարավորություն տալ, որպեսզի այս անգամ չզրուցի լրագրողների հետ:
EcoNews.am-ն ապօրինի որսի հերթական դեպքն է բացահայտել: «Հերոսն» այս անգամ ոստիկան է: 37-ամյա Վոլոդյա Ղազարյանը տարիներ շարունակ Կարմիր գրքում գրանցված կենդանիներ է որսացել՝ կարմրախածի բադ, անդրկովկասյան փասիան, հայկական մուֆլոն եւ այլն: Ղազարյանը նաեւ լուսանկարվել է որսած կենդանիների հետ, հրապարակել նկարներն ու մեկնաբանություններ գրել: Ոստիկանությունն արձագանքել է հրապարակմանը՝ վստահեցնելով, որ Վոլոդյա Ղազարյանն այլեւս իրենց աշխատողը չէ:
Ֆրասիայի նախագահն Արցախ կայցելի, երբ հակամարտությունը կարգավորված լինի: Ֆրանսիայի հայկական կազմակերպությունների Համակարգող խորհրդի ամենամյա հավաքին մասնակցած Էմանուել Մակրոնին Արցախ այցելելու հրավեր են ուղղել խորհրդի ղեկավարները: Մակրոնը հույս է հայտնել, որ կկարողանա մի օր գալ եւ ասել, որ «ղարաբաղյան հակամարտությունը կարգավորված է»: Ադրբեջանական լրատվամիջոցները, ի դեպ, անմիջապես անդրադարձել են սրան՝ գրելով, թե Ֆրանսիայի նախագահը, իբր, հրաժարվել է Ղարաբաղ գնալ: Իսկ Էմանուել Մակրոնը որոշել է կատարել նախընտրական խոստումներից մեկը. հայկական կամակերպությունների հավաքի ժամանակ նա հայտարարել է, Հայոց ցեղասպանության օրը ներառվելու է Ֆրանսիայի հիշատակի օրացույցում, իսկ համապատասխան որոշումը խոստացել է հրապարակել առաջիկա ամիսներին:
Դոնալդ Թրամփն ամերիկյան Կոնգրեսին ամենամյա ուղերձն է հղել՝ ամփոփելով իր նախագահության առաջին տարին: Թրամփը խոսել է հիմնականում երկրի ներքին խնդիրների մասին՝ շարքային ամերիկացիների, որոնք հզորացրել են երկիրը, հարկային բարեփոխումների, տնտեսության մասին՝ «անհավանական առաջընթացով»: ԱՄՆ նախագահն անդրադարձել է նաեւ Հյուսիսային Կորեային, Իրանին, Ռուսաստանին եւ Չինաստանին: Փհենյանի միջուկային հրթիռների փորձարկումները նա սպառնալիք է անվանել, իսկ Չինաստանին եւ Ռուսաստանին հակառակորդներ կոչել: Դոնալդ Թրամփը նաեւ հայտարարել է, որ որոշել է չփակել Գուանտանամոյի բանտը, թեեւ նրա նախորդը՝ Բարաք Օբաման 2009 թվականին կարգադրել էր հնարավորինս շուտ փակել այն, բայց Կոնգրեսը դեմ էր: Նշենք, որ կալանավայրը բացել է Ջորջ Բուշ կրտսերը, 2001 թվականի սեպտեմբերի 11-ի ահաբեկչական հարձակումներից հետո: Ներկայում այնտեղ 41 կալանավոր է պահվում:
Արմեն Ջիգարխանյանը կրկին հիվանդանոցում է հայտնվել: Ռուսական լրատվամիջոցների փոխանցմամբ՝ դերասանին հոսպիտալացրել են սրտի նոպայով եւ անգիտակից վիճակում: Աղբյուրների համաձայն՝ Ջիգարխանյանի սրտի նոպան կապված է այն բանի հետ, որ նա մինչեւ վերջ չի բուժել թոքաբորբը եւ բարդություններ են առաջացել: Դերասանի թատրոնում հաստատել են նրա հոսպիտալացման մասին տեղեկությունը:
1866 թվականից ի վեր առաջին անգամ Երկրի բնակիչները հազվագյուտ երեւույթի են ականատես եղել՝ միանգամից երեք տիեզերական իրադարձության: Մարդիկ դիտել են «Գերլուսինը», երկնագույն լուսինն ու «արյունոտ» լուսինը: Տիեզերական բացառիկ այս շոուն «գերերկնագույն արյունոտ Լուսին» անվանումն է ստացել: Այս երեւույթը նկատվում է խավարման ժամանակ, երբ Լուսինը կարմրավուն երանգ է ստանում: Երկնագույն լուսինը նույնպես բացառիկ է. այն դիտվում է 2-3 տարին մեկ անգամ: Հայաստանի բնակիչները, ցավոք, բացառիկ այս երեւույթին ականատես չեն լինի: Արեւածագին այստեղ նկատելի է եղել միայն «գերլուսինը»:
Հունվարի 31-ին դոլարն ու եվրոն թանկացել են: Դոլարի փոխարժեքը կազմել է 480 դրամ, եվրոյինը՝ 598, ռուբլունը՝ 8 դրամ 56 լումա, ֆունտինը՝ 679 դրամ:
Փետրվարի 1-ի ցերեկը հանրապետությունում սպասվում է առանց տեղումների եղանակ, գիշերը հնարավոր են թույլ ձյան տեսքով տեղումներ: Օդի ջերմաստիճանը 6-8 աստիճանով կբարձրանա: Երեւանում նույնպես գիշերը հնարավոր են տեղումներ: Մայրաքաղաքում գիշերը կդիտվի 0-2 աստիճան ցուրտ, ցերեկը՝ +7+9 աստիճան տաքություն: