Հայկական կողմը բավականաչափ վկայություններ եւ ապացույցներ ունի Ադրբեջանում Սումգայիթի եւ Բաքվի ջարդերի վերաբերյալ, դրանք կրկին բարձրաձայնման կարիք ունեն: Այս մասին փետրվարի 1-ին տեղի ունեցած արտաքին հարաբերությունների մշտական խորհրդարանական հանձնաժողովի նիստից հետո լրագրողների հետ զրույցում ասաց հանձնաժողովի նախագահ, Հայաստանի իշխող Հանրապետական կուսակցության փոխնախագահ Արմեն Աշոտյանը:
Նրա խոսքով՝ դա պայմանավորված է այն հանգամանքով, որ ամերիկյան, եվրոպական եւ նույնիսկ ռուսական քաղաքական շրջանակներում վերջին երեք տասնամյակի ընթացքում նոր մարդիկ են մտել քաղաքական դաշտ, որոնք բավարար չափով տեղեկացված չեն Ադրբեջանում տեղի ունեցած ողբերգական իրադարձությունների մասին: «Մեր պարտքն է մշտապես պահել այս թեման օրակարգում, եւ ոչ մի դեպքում չպետք է մտածենք, որ բոլորն արդեն ամեն ինչ գիտեն այս մասին»,- ասաց խորհրդարանական հանձնաժողովի ղեկավարը:
Ըստ Աշոտյանի՝ լուրջ խնդիր կա, որը կապված է միջազգային հանրության իրազեկվածության բացակայության հետ՝ չհաշված արտաքին դաշտում այս խնդրի լոբբինգը: Այդպես, ըստ պատգամավորի, փետրվարի 22-ին ՀՀ խորհրդարանում կայանալիք «Սումգայիթյան ջարդեր: Հայերի նկատմամբ ատելության հրահրումը՝ որպես Ադրբեջանի պետական քաղաքականություն» թեմայով լսումները կարող են դրական ազդեցություն ունենալ միջազգային հանրության իրազեկման գործում:
Հիշեցնենք, որ 1988 թվականի փետրվարի 27-29-ին՝ Լեռնային Ղարաբաղի ինքնավար մարզի ժողովրդական պատգամավորների մարզային խորհրդի՝ ԼՂԻՄ-ը Ադրբեջանական ԽՍՀ-ից Հայկական ԽՍՀ-ին փոխանցելու միջնորդության որոշումից ընդամենը մի քանի օր անց, Բաքվից 25 կմ հեռավորության վրա գտնվող Սումգայիթ քաղաքում տեղի ունեցան հայ բնակչության զանգվածային ջարդերը: Տեղական իշխանությունների եւ ոստիկանության անգործության պայմաններում ազգային պատկանելիության պատճառով զանգվածային սպանությունները, բռնաբարություններն ու ծաղրանքները դադարեցնել հաջողվել է միայն ԽՍՀՄ ՆԳՆ ներքին զորքերի ստորաբաժանումների՝ քաղաք մուտք գործելուց հետո: Բազմաթիվ փորձագետների կարծիքով՝ կոտորածները հրահրվել էին Ադրբեջանի նախկին նախագահ Հեյդար Ալիեւի եւ իր գլխավորած Նախիջեւանի կլանի կողմից, որոնց նպատակն էր վարկաբեկել հանրապետության ղեկավարությանը եւ նորից գլխավորել հանրապետությունը: Նմանատիպ իրավիճակ էր տիրում նաեւ 1990 թվականի հունվարի 13-ից 19-ը Բաքվում տեղի ունեցած հայերի էլ ավելի զանգվածային ջարդերի ժամանակ:
