Հայաստանի ԱԻՆ-ում, այսօր՝ փետրվարի 1-ին, ժամը 10:53-ին ահազանգ է ստացվել, որ ուժեղ քամու հետեւանքով վնասվել է Գեղարքունիքի մարզի Վերին Գետաշեն գյուղի դպրոցի տանիքը. անհրաժեշտ է փրկարարների օգնությունը:

Դեպքի վայր է մեկնել մեկ մարտական հաշվարկ:

Shamshyan.com-ի  փոխանցմամբ, ուժեղ քամու հետեւանքով գյուղի դպրոցի տանիքի մեծ մասը պոկվել եւ թափվել է գետնին, ոչ ոք չի տուժել:

Վնասվել են գյուղի դպրոցի տնօրենի եւ զինղեկի ավտոմեքենաները։

Աղբյուրի փոխանցմամբ, դպրոցի տնօրեն Վոլոդյա Գասպարյան պատմել է. «Աշխատասենյակում նստած էի, երբ ուժեղ ձայն լսվեց։ Ինձ թվաց՝ երկրաշարժ է։ Միագամից դուրս եկա, որպեսզի տեսնեմ՝ հո մարդ չի՞ տուժել։ Բարեբախտաբար, ոչ ոք չի տուժել, սակայն դպրոցը կրել է խոշոր չափի նյութական վնաս։ Տանիքի 80 տոկոսը մի քանի վայրկյանում քամին պոկել եւ շպրտել է»։ Վնասվել են նաեւ պատուհաններ, համակարգչային սենյակը:

Գեղարքունիքի մարզպետ Կ. Բոթոյանը կատարվածի մասին արդեն տեղեկացրել է կառավարությանը եւ առաջիկայում ձեռնարկելու են անհրաժեշտ գործողություններ՝ խնդիրը կարճ ժամանակում լուծելու համար։ Այս պահին դպրոցում դասապրոցեսը ժամանակավորապես դադարեցվել է եւ 200 երեխաներին ուղարկել են տուն։