Մոնթի անունով շեղանկյունազարդ պիթոնի ճաշը համացանցում է հայտնվել եւ թեժ բանավեճի տեղիք տվել, հայտնում է ABC News-ը:
Երկու տեսախցիկներով տեսանյութը նկարահանել է ավստրալացի Գրեգ Հոսքինգը: Նրա խոսքով՝ Մոնթին վաղուց է բնակվում իր տան մոտ, սակայն պարբերաբար անհետանում է: «Մենք նրան մի քանի շաբաթ չէինք տեսել, երբ հանկարծ բակում գործ անելիս թռչնի ծղրտոց լսեցի եւ վեր նայեցի: Ծառի սաղարթին ես տեսա պարկամկան կարմիր մորթին, որը կախված էր պիթոնի երախից»,- պատմել է տղամարդը:
Նա որոշել է 9-ամյա որդու հետ հետեւել օձին: Ավելի ուշ սողունն անսպասելի որոշել է ավելի ցած իջնել: «Մենք գրեթե կարող էինք նրան հպվել, սակայն որոշեցինք դա չանել: Օձը գետնից ընդամենը 5 մետր բարձրությամբ էր: Դա կախարդող տեսարան էր»,- հավելել է Հոսքինգը: Նրա խոսքով՝ պիթոնը 45 րոպեում իր զոհին կլլել է:
