Սասնա ծռերի անդամ Աշոտ Պետրոսյանի դեմ 1.5 տարի առաջ մահափորձ է կատարվել, սակայն մինչեւ հիմա ոչինչ չի պարզվել: Այս մասին այսօր՝ փետրվարի 1-ին, Երեւանի ընդհանուր իրավասության դատարանի Ավան եւ Նոր Նորքի նստավայրում հայտարարեց Աշոտ Պետրոսյանի պաշտպան Արայիկ Պապիկյանը:
«Աշոտ Պետրոսյանի դեմ սպանության փորձ է կատարվել, ավելի քան 1.5 տարի առաջ, մեղադրող կողմն այդ մասին ընդհանրապես չի մտածել, բայց դատարանը նրա մասին մտածելով հանրային պաշտպան է տրամադրում: Մարդուն փորձում են սպանել, դրա համար ոչինչ չի արվում, բայց պաշտպան եք ներգրավվում: Ո՞ւմ դիմենք, այսպես եք պաշտպանում Աշոտ Պետրոսյանի իրավունքները: Ես կասեի՝ Աշոտ Պետրոսյանի իրավունքները ընդհանրապես չեն հետաքրքրում դատարանին»,-ասաց պաշտպանը:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի:
«Սասնա ծռեր» խմբի 11 անդամի մասով գործը քննում է Արտուշ Գաբրիելյանը, իսկ անջատված մասերով երկու գործը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը: