Ժիրայր Սեֆիլյանի եւ մյուսների գործով դատական նիստին այսօր` փետրվարի 2-ին, Երեւան քաղաքի ընդհանուր իրավասության դատարանի Շենգավիթ վարչական շրջանի նստավայրում հարցաքննվեց «Սասնա ծռեր» խմբի անդամ Պավլիկ Մանուկյանը: Նա դատարան էր ներկայացել իր պաշտպաններ Հրանտ Գրիգորյանի եւ Հարություն Բաղդասարյանի հետ:
Պաշտպան Հրանտ Գրիգորյանը նշեց, որ Պավլիկ Մանուկյանը հարցաքննությունից առաջ պետք է ծանոթանա դատաքննության ընթացքում ձեռքբերված նյութերի, մյուս ամբաստանյալների ցուցմունքների հետ, նոր միայն հարցաքննվի: Պավլիկ Մանուկյանն էլ նշեց, որ պատրաստ է պատասխանել պաշտպանների հարցերին, իսկ դատարանի հարցերին չի պատրաստվում պատասխանել:
«Իմ պաշտպանը հստակ արտահայտվեց, Դուք գիտեք, որ ես Հայաստանում դատարան չեմ տեսնում, դա չարիք է: Կպատասխանեմ ոչ թե քո հարցերին, այլ պաշտպանների հարցերին: Դուք գիտեք, որ սա օդից նկարած գործ է, դեմս կին չլիներ նստած, ես ձեզ կոռեկտության սահմաններ ցույց կտայի»,-դիմելով դատարանին` ասաց նա:
Ամբաստանյալներից Գեւորգ Սաֆարյանի շահերի պաշտպան ներգրավված հանրային պաշտպան Աննա Ջուվանովան միջնորդություն ներկայացրեց Պավլիկ Մանուկյանի հարցաքննության ժամանակ Գեւորգ Սաֆարյանի ներկայությունն ապահովելու մասին, ուշացումով նիստին ներկայացած Տիգրան Եգորյանն առարկեց հանրային պաշտպանի միջնորդությանը` նշելով, որ Աննա Ջուվանովան չի հանդիսանում Գեւորգ Սաֆարյանի շահերի պաշտպան եւ չի կարող նրա վերաբերյալ միջնորդություն ներկայացնել:
«Նա չի տեսակցել Գեւորգ Սաֆարյանին, նա չգիտի, թե ինչ վիճակում է Գեւորգ Սաֆարյանը: Գեւորգ Սաֆարյանը չի ցանկանում հանրային պաշտպան ունենալ եւ Գեւորգ Սաֆարյանին վերաբերող որեւէ դիրքորոշում չի կարող ներկայացնել»,-ասաց նա:
Աննա Ջուվանովան Տիգրան Եգորյանի առարկությունից հետո դատարանին խնդրեց առանց քննության թողնել իր միջնորդությունը:
Պաշտպանական կողմը միջնորդություն ներկայացրեց Պավլիկ Մանուկյանի հարցաքննության ժամանակ ապահովել Ժիրայր Սեֆիլյանի եւ Գեւորգ Սաֆարյանի ներկայությունը դատական նիստին: Մեղադրող կողմը առարկեց միջնորդությանը: Դատարանը բավարարեց պաշտպանական կողմի միջնորդությունը եւ Ժիրայր Սեֆիլյանին եւ Գեւորգ Սաֆարյանին թույլ տվեց բերել նիստերի դահլիճ:
Նշենք, որ Ժիրայր Սեֆիլյանին նիստերի դահլիճ բերելուց հետո դատարանը թույլ տվեց նրան մոտենալ Պավլիկ Մանուկյանին եւ ողջագուրվել:
Գեւորգ Սաֆարյանի շահերի պաշտպան Տիգրան Եգորյանը հայտարարեց, որ Գեւորգ Սաֆարյանը հրաժարվում է հանրային պաշտպան Աննա Ջուվանովայից:
Դատավոր Տաթեւիկ Գրիգորյանը նշեց, որ պաշտպանը չի կարող նման միջնորդությամբ հանդես գալ, այդ հայտարարությունը պետք է անի Գեւորգ Սաֆարյանը: Գեւորգ Սաֆարյանն առանց ոտքի կանգնելու հայտարարեց, որ հրաժարվում է հանրային պաշտպանից, սակայն, դատարանը հայտարարեց, որ ամբաստանյալը պետք է պահպանի դատավարական նորմերը եւ դատարանի հետ խոսելիս ոտքի կանգնի: Գեւորգ Սաֆարյանը, սակայն, այդպես էլ ոտքի չկանգնեց:
Հիշեցնենք, որ Ժիրայր Սեֆիլյանը մեղադրվում է զանգվածային անկարգություններ կազմակերպելու եւ զենքի գործադրմամբ շենքեր, շինություններ զավթելու նախապատրաստության մեջ: Բացի Սեֆիլյանից, մեղադրանք է առաջադրվել նաեւ Գեւորգ Սաֆարյանին, Ներսես Պողոսյանին, Գալուստ Գրիգորյանին, Հրայր Թոփչյանին, Սասունիկ Կիրակոսյանին եւ Հովհաննես Պետրոսյանին:
Այս գործը քննվում է Երեւանի Աջափնյակ եւ Դավթաշեն վարչական շրջանների ընդհանուր իրավասության դատարանում, սակայն նիստերն անցկացվում են արտագնա` Շենգավիթ վարչական շրջանի ընդհանուր իրավասության դատարանում: