Հայազգի ամերիկացի պրոֆեսոր Մարկ Մուղալյանը, որը հերոսաբար դիմադրել էր Ամստերդամ-Փարիզ գնացքում ուղեւորների վրա հարձակված հանցագործին, կխաղա ինքն իր դերը Քլինթ Իսթվուդի «15:17-ին Փարիզում» կոչվող ֆիլմում:
Որոշ աղբյուրների համաձայն՝ ֆիլմում կնկարահանվի նաեւ նրա կինը՝ Իզաբելը, որը հարձակման ժամանակ նույնպես գնացքում էր, հայտնում է Armenian Weekly-ն:
Ֆիլմի սցենարը հիմնված է ինքնակենսագրական գրքի վրա, որը գրել են գնացքի երեք ամերիկացի ուղեւորները, որոնք օգնել են հարձակման խոչընդոտմանը: Նրանք եւս ֆիլմում կխաղան:
Սպասվում է, որ ֆիլմը կթողարկվի փետրվարի 9-ին:
Հիշեցնենք, որ 2015 թվականին Սորբոնի համալսարանի պրոֆեսոր Մարկ Մուղալյանը հերոսաբար դիմադրել է Ամստերդամ-Փարիզ երթուղով շարժվող արագընթաց գնացքի ուղեւորների վրա հարձակված հանցագործին: Մուղալյանը հայկական ծագում ունի՝ նա ԱՄՆ Վիջինիա նահանգում բնակվող հայ ընտանիքից է:
Իր արարքի համար պրոֆեսոր Մարկ Մուղալյանը Ֆրանսիայի նախկին նախագահ Ֆրանսուա Օլանդից Պատվո լեգեոնի շքանշան է ստացել: