Չի բացառվում, որ «Սասնա ծռերի» անդամներից ոմանք ցմահ ազատազրկման դատապարտվեն: Այս մասին NEWS.am-ի հետ զրույցում ասաց պաշտպան Արայիկ Պապիկյանը:
«Կա մեղադրանք, որը կարող է հանգեցնել ցմահ ազատազրկման, այդպիսի վտանգ կա իրականում: Մեր պաշտպանյալներից որեւէ մեկը մինչեւ հիմա չի մտահոգվել, որ նման մեղադրանք կա, կամ կարող է ցմահ ազատազրկում լինել, քանի որ իրականացվող դատավարությունը նրանք արդարադատություն չեն դիտարկում, բայց նման բան կարող է լինել»,-ասաց Արայիկ Պապիկյանը:
Պաշտպանը հավելեց, որ իրականում «Սասնա ծռերի» դատավարությունը քաղաքական դատավարություն է, եւ անհնար է կանխատեսել, թե ապագայում ինչ վճիռներ կկայացվեն:
«Այս 1.5 տարվա ընթացքում «Սասնա ծռերի» գործով մամուլում այնպիսի հրապարակումներ են լինում, որոնք եւ լուրջ են, եւ զավեշտի են հասնում: Անկախ նրանից, թե հետագայում ինչպիսի դատական ակտեր կկայացնեն, պարզ է որ «Սասնա ծռերի» դատավարությունը քաղաքական դատավարություն է, հետեւաբար, իրավաբանությունը եթե մի տեղ գործ չունի իրավաբանության կողմից կայացված դատական ակտերը չեն կարող համարվել արդար դատական ակտտեր: Այստեղ խնդիրը քաղաքական հարթության մեջ պետք է լուծվի, «Սասնա ծռերից» որեւէ մեկին չի առաջադրվել մեղադրանք, որը կվերաբերվեր իր կատարածի շարժառիթին: Առանց դրա չի կարող քրեական իրավունքը լինել, նման պայմաննեերում ցանկացած տիպի դատական ակտ, ինչպիսին ուզում է լինի, ամենախիստ կամ մեղմ ակտը, ինքն արդեն արդարադատություն չի լինի»,-ասաց Արայիկ Պապիկյանը:
