Ազգային ժողովի ՀՀԿ խմբակցության պատգամավոր, նախկին ոստիկանապետը Ալիկ Սարգսյանի համար անհասկանալի է, թե ինչու նոր օրենսդրությամբ, Հանրապետության նախագահն ու ԱԺ նախագահը չեն ընդգրկվելլու Ազգային անվտանգության խորհրդի կազմում:
Նշենք, որ խորհրդարանական կառավարման համակարգին անցնելուց հետո Ազգային անվտանգության խորհուրդը նախագահից կանցնի վարչապետի ենթակայության ներքո, իսկ խորհրդին այլեւս չեն անդամակցի պետության գլուխ համարվող ՀՀ նախագահը եւ Ազգային ժողովի նախագահը:
ՀՀԿ խմբակցության պատգամավոր Գեւորգ Կոստանյանը հիմնավորում է, որ ՀՀ եւ ԱԺ նախագահները որեւէ գործառույթ չունեն այս կառույցում եւ նրանց ընդգրկվելը նպատակահարմար չէ: Անվտանգության խորհուրդը նախկին խորհրդատվական մարմնից անցնելու է որոշում կայացնողի, ու ստացվում է, որ փաստորեն որոշումներ կայացնելու հարցում երկուսն էլ որեւէ դերակատարում, իրավասություն չունեն:
NEWS.am-ի հետ զրույցում Ալիկ Սարգսյանը վստահեցրեց, թե մանրամասնորեն չի ուսումնասիրել նոր ԱԱԽ-ի գործառույթները եւ չի կարող պնդել` նպատակահարմար է, թե ոչ նախագահների անդամակցությունը, բայց տարակուսած է` ինչով պետք է նրանք խանգարեն: «Ես հանգամանորեն տեղյակ չեմ` ինչու է դուրս մնացել, կարծում եմ` մեկնաբանություններ կլինեն, բայց ամեն դեպքում, որ երկրի կառավարման ամբողջ պուլսը Ազգային ժողովով պետք է անցնի ու ԱԺ նախագահը պետք է տեղյակ լինի ամեն ինչից, դա փաստ է, բայց թե ինչի չի ընդգրկվել, դժվարանում եմ պատասխանել»:
Անդրադառնալով այն բացատրություններին, որ նրանք ի պաշտոնե որեւէ գործառույթ չունեն, Ալիկ Սարգսյանն ասաց. «Չեմ հասկանում Անվտանգության խորհրդում լինելու դեպքում ԱԺ նախագահն ինչով պետք է խանգարի խորհրդի որոշումներին, սա ես չեմ հասկանում: Կարծում եմ` իմ բացատրությունը տեղին չի լինի, քանի որ ես հստակ չգիտեմ պատճառը: Միգուցե քաղաքական նկատառումներ կան, չեմ կարող ասել: Ինձ թվում է, որ ԱԺ նախագահը երեւի լինի ավելի անկախ մարմին, դրա համար չեն ներառել, չեմ կարող հստակ ասել»: