Ոստիկանության քննչական գլխավոր վարչության Եղվարդի քննչական բաժնում նյութեր են նախապատրաստվում դեկտեմբերի 25-ին Լուսակերտի թռչնաբուծական ֆաբրիկայի մոտ տեղի ունեցած միջադեպի հետ կապված։
Ինչպես NEWS.am-ին հայտնեց ֆոտոլրագրող Գագիկ Շամշյանը, այդ օրը ժամը 13.30-ի սահամաններում նշված տեղում թռչնաֆաբրիկայի անվտանգության աշխատակից, Երեւանի Նոր Նորք վարչական շրջանի Մոլդովական փողոցի 30 շենքի 23 բնակարանի բնակիչ 38-ամյա Հարություն Սեյրանի Սամսոնյանը ծեծի է ենթարկել, Երեւանի Էրեբունի ՎՇ Վարդաշեն 3-րդ փողոցի բնակիչ 54-ամյա Լեւոն Արծվիկի Ավետիսյանին։ Վերջինս աշխատում է «Միլիոն-միլիոնուկես պլյուս» ընկերությունում։ Լեւոն Ավետիսյանը իրեն ծեծելու մասին հայտարարություն է տվել Ոստիկանության Էրեբունու բաժնում, որտեղից էլ նյութերն ուղարկվել են Եղվարդի բաժին։
Գագիկ Շամշյանին միջադեպի ականատեսները հայտնել են, որ տուժածը փորձել է ձու ձեռք բերել թռչնաբուծականից։ Լ.Ավետիսյանին սակայն մերժել են, ինչը դժգոհություն է առաջացրել նրա մոտ, եւ արդյունքում, Ավետիսյանի պնդմամբ, անվտանգության աշխատակիցը իրեն ծեծի է ենթարկել։