Թուրքիայի փոխվարչապետ եւ թուրքական կառավարության խոսնակ Բեքիր Բոզդագը փետրվարի 4-ին հայտարարել է, որ Զինված ուժերի թիրախ կարող են դառնալ Ժողովրդական ինքնապաշտպանական ուժերի քրդական ջոկատների համազգեստով ԱՄՆ զինվորները: Նրա խոսքերը փոխանցում է «ՏԱՍՍ»-ը՝ վկայակոչելով CNN Turk հեռուստաալիքը:
«Եթե այդ քրդական ուժերը չհեռանան սիրիական Մանբիջից, ապա մենք նաեւ այդ քաղաք կմտնենք, ինչպես նաեւ կշարժվենք Եփրատից դեպի արեւելք: Մեր թիրախն են նաեւ քրդական ջոկատների համազգեստով ամերիկացի զինվորականները», - հայտարարել է նա:
Բոզդագի խոսքով՝ «սիրիական Աֆրինում «Ձիթենու ճյուղ» օպերացիայի անցկացման 16 օրվա ընթացքում Թուրքիայի Զինված ուժերը 932 ահաբեկիչ են ոչնչացրել»: