Օրենքում պետք է լինի հստակ ներման քաղաքականություն, որը սուբյեկտիվ ընդգծված վերաբերմունքի տեղիք չտա: Այս մասին այսօր՝ փետրվարի 5-ին, ԱԺ պետաիրավական, մարդու իրավունքների պաշտպանության հարցերի մշտական հանձնաժողովի նիստում հայտարարեց «Ծառուկյան» խմբակցության պատգամավոր Գեւորգ Պետրոսյանը՝ անդրադառնալով «Ներման մասին» օրենքի նախագծին:
Նրա խոսքով, այս օրինագծով ներման իրավունքը ձեւականորեն պահպանվել է ՀՀ նախագահի իրավասությունների շրջանակներում, բայց, ըստ էության, այնպիսի ընթացակարգ է սահմանված, որ վարչապետի ցանկության բացակայության դեպքում, ՀՀ նախագահն իրավաբանորեն անգամ զրկվում է ներում շնորհելու իրավունքից:
Գեւորգ Պետրոսյանը առաջարկեց, որ հեռտագայում տարբերակված, խտրական մոտեցումներ ցուցաբերելու հնարավորություն թույլ չտալու համար պետք է գոնե ինչ-որ չափանիշներ ընտրվեն, թե որ դեպքում մարդը կարող է ներվել, որ դեպքում՝ ոչ:
«Օրինագիծը այս վիճակում չի հավակնում կանխել հավանական խտրական վերաբերմունքի դրսեւորումը: Որեւէ չափանիշ ես նախագծում չտեսա, թե որ դեպքում վարչապետը կարող է եզրակացություն տալ նախագահին՝ ներում շնորհելու անհրաժեշտության, որ դեպքում՝ դրա բացակայության վերաբերյալ»,-ասաց պատգամավորը:
Ի պատասխան Արդարադատության փոխնախարար Սուրեն Քրմոյանն ասաց, որ ի տարբերություն գործող կարգավորումների, իրենք փորձել են օրենքում ավելի մանրամասն կարգավորել այն հարցերը, որոնք պետք է քննարկվեն ներման խնդրագրի քննարման ժամանակ: «Հստակ նշել ենք դատապարտյալի անձը, առողջական վիճակը, սոցիալական դրությունը, իր վերաբերմունքը: Այսինքն չհավակնելով ավելի մանրամասն կարգավորել, որովհետեւ սա իրոք բացառիկ իրավասություն է, մենք դուրս ենք բերել որոշ չափանիշներ: Օրինակ, Իսպանիայում ընդհանրապես չկան չափանիշներ, Բելգիայում հիմք է ընդունվում միայն անձնական գործում առկա տվյալները»,-նշեց փոխնախարարը:
Գեւորգ Պետրոսյանն էլ արձագանքեց, որ քանի որ չկա ներման ոլորտում պետական քաղաքականություն, այստեղ կարող են լինել հնարավոր տարբերակումներ, որոնք չբխեն օբյեկտիվությունից: «Օրինակ, եթե մեկն ընտրությունների ժամանակ «արժանի ծառայություն» է մատուցել այս կամ այն թեկնածուի ընտրվելուն, նրա խնդրագիրը կարող է հարգվել, իսկ մյուսը, որը ընդդիմադիր հայացքներ է ունեցել, կարող են ասել, որ քանի որ օրենքը հստակ չափանիշներ չի նշում, մենք այսպես ենք հարմար գտել»:
Ավելի վաղ NEWS.am-ը հայտնել էր, որ Արդարադատության նախարարությունը շրջանառության մեջ է դրել «Ներման մասին» օրենքում փոփոխությունների նախագիծը, որով ներման բացառիկ իրավունքն այլեւս ՀՀ նախագահի մենաշնորհը չէ:
