Իսպանական ոստիկանությունը ձերբակալել է հայտնի թմրաբարոն Խոսե Ռամոն Պրադո Բուգալյոյին՝ հայտնի Սիտո Մինյանկո մականունով։ Ոստիկանական գործողության ըթնացքում հրազենային վնասվածքներ են ստացել երկու իրավապահներ, հաղորդում է «ՌԻԱ Նովոստին»։
Սիտո Մինյանկոն ավելի վաղ դատապարտվել էր 25 տարվա ազատազրկման, սակայն 2015թ. դատապարտման ռեժիմը մեղմացվել էր, նա աշխատում էր Ալխեսիրաս քաղաքի ավտոկայանատեղում, իսկ բանտում միայն գիշերում էր։ Չնայած վճռին՝ նա շարունակել է զբաղվել հանցավոր գործունեությամբ։ Առաջիկայում պետք է կայանա Մինյանկոյի նոր դատաքննությունը։
Մեկ շաբաթ առաջ 3,8 տոննա կոկաին էին հայտնաբերել եւ գործողություն սկսել Ալխեսիրաս, Կոլյադո-Մեդյանո, Մալագա եւ Մադրիդ քաղաքներում։ Ընդհանուր առմամբ, ձերբակալվել է հինգ կասկածյալ։