Հայտնի է դարձել անցյալ շաբաթ App Store-ից Telegram մեսենջերի հավելվածների ժամանակավոր հեռացման պատճառը: Հիշեցնենք, որ Telegram-ը եւ Telegram X-ը փետրվարի 1-ի գիշերվանից սկսած անհասանելի էին դարձել բեռնման համար, սակայն օրվա ավարտին կրկին վերականգնվել էին, հաղորդում է «Վեստի»-ն:
Telegram նախագծի ղեկավար Պավել Դուրովը այդ ժամանակ հայտնել էր, որ հեռացման պատճառը «անընդունելի բովանդակություն» էր, որը հասանելի էր դարձել հավելվածի միջոցով, սակայն ինչ բովանդակության մասին էր խոսքը, Դուրովը չէր նշել: Մանրամասները ներկայացրել են Apple-ում, ընդ որում, արել է դա ընկերության փոխնախագահ Ֆիլ Շիլլերը՝ պատասխանելով Telegram-ի ամերիկացի օգտատիրոջ էլ. նամակին: Վերջինս Շիլլերի պատասխանով կիսվել էր 9to5mac պարբերականի հետ:
«Telegram-ի հավելվածները հեռացվել են App Store-ից, քանի որ App Store-ի թիմը նախազգուշացվել էր հավելվածում անօրինական բովանդակության մասին, մասնավորապես՝ մանկական պոռնոգրաֆիայի: Համոզված լինելով ապօրինի բովանդակության առկայության մեջ՝ աշխատակիցները խանութից հեռացրել էին հավելվածները եւ այդ մասին ծանուցել էին մշակողին, ինչպես նաեւ՝ իշխանություններին »: