Ինչու Ռուսաստանի պես մեծ երկիրը, որը Հայաստանից 20-30 անգամ ավելի շատ շաքարավազ է ներկրում, իր ներկրածի մի փոքր բաժինը չի բերում Հայաստան: Այսօր՝ փետրվարի 6-ին, Աժ-ում նման հարցադրմամբ հանդես եկավ ԱԺ փոխնախագահ, «Ծառուկյան» խմբակցության պատգամավոր Միքայել Մելքումյանը՝ անդրադառնալով Հայաստանում մենաշնորհային շուկաներին:
«Ռուսաստանի պես հզոր պետությունը նույն շաքարավազը 20-30 անգամ ավելի շատ է ներկրում, իսկ եթե մեծ քանակով են ներկրում, բնական է, գներն ավելի ցածր են: Բա ինչո՞ւ դրա մի փոքր քանակը Հայաստան չեն ներկրում: Հաշվի առնելով, որ մեծ քանակով բերելիս էժան է գինը, կարծես թե ձեռնտու պետք է լիներ դրա մի մասը Հայաստան բերել: Այսինքն խոչընդոտներ կա՞ն, որ Ռուսաստան բերած էժան ապրանքից մի փոքր մասը չի հասնում Հայաստան: Գուցե լուրջ պատճառնե՞ր կան, որ չի գալիս»,-հայտարարեց Մելքումյանը:
Ի պատասխան ՀՀԿ խմբակցության պատգամավոր Խոսրով Հարությունյանը նշեց, որ նախորդ տարի Հայաստան է ներկրվել մոտ 36 հազար տոննա կարագ, որից 30 հազարը գալիս է երրորդ երկրներից, 6 հազարը՝ ԵՏՄ-ից, որից 4-ը ՌԴ-ից. «Գների մեծ տարբերություն չկա, որովհետեւ միջազգային գների բարձրացումն ազդում է նաեւ ռուսական շուկայի վրա: Բայց բարձրացված հարցը կարեւոր է եւ պետք է ուշադրության կենտրոնում պահել»:
ՀՀ տնտեսական զարգացման և ներդրումների նախարարի տեղակալ Հովհաննես Ազիզյանն էլ նշեց, որ օրինակ, 2017-ին Հայաստան է ներմուծվել 80 հազար տոննա շաքար եւ շաքարի հումք. «2017-ին մոտ 17 հազար տոննա սպիտակ շաքար ներմուծվել է ՌԴ-ից, որը նախկինում չի եղել»,-ասաց նա՝ հավելելով, որ դա հենց ԵՏՄ միասնական տարածք ունենալու արդյունքն է:
