Փարիզի գլխավոր տեսարժան վայր Էյֆելյան աշտարակը այցելուների համար փակ է եղանակային վատ պայմանների պատճառով, նշված է հուշարձանի Facebook-ի պաշտոնական էջում, փոխանցում է «ՌԻԱ Նովոստի»-ն:
Հաղորդագրության մեջ նշված է, որ կարող են մուտքի հնարավորություն ունենալ միայն նրանք, ովքեր ռեստորանում սեղան են ամրագրել:
Ֆրանսիայի մայրաքաղաքում արդեն երկրորդ օրն է՝ մանր ձյուն է տեղում: Սպասվում է, որ տեղումները կդադարեն միայն չորեքշաբթի:
Էյֆեկյան աշտարակը Ֆրանսիայի կառավարության պատվերով կառուցվել է 1889 թվականին ինժեներ Գուստավ Էյֆելի նախագծով եւ դարձել է իր ժամանակի աշխարհի ամենաբարձր կառույցը: Սկզբում նախատեսվում էր աշտարակը 20 տարուց հետո ապամոնտաժել, քանի որ փարիզցիներից շատերը չէին հավանել կառույցի դիզայնը, սակայն այդ տարիների ընթացքում այն դարձավ Փարիզի խորհրդանիշը: