Աշխարհի աշխարհաքաղաքական իրավիճակը վերջին տասնամյակում շատ արագ փոխվում է, եւ Շվեյցարիան ցավում է, որ 2009 թվականին Ցյուրիխում ստորագրված հայ-թուրքական արձանագրություններն այդպես էլ չեն իրականացվել: Այս մասին ՀՀ Ազգային ժողովում խորհրդարանի նախագահ Արա Բաբլոյանի հետ համատեղ մամուլի ասուլիսի ժամանակ հայտարարել է Շվեյցարիայի խորհրդարանի Ստորին պալատի նախագահ Դոմինիկ դե Բումանը: Նրա խոսքով՝ հայ-թուրքական հարաբերությունների կարգավորումը բխում է ամբողջ տարածաշրջանի շահերից եւ կնպաստի խաղաղության հաստատմանը:
«Մենք հույս ունենք, որ Հայաստանում ընտրությունների միջոցով տեղի ունեցած փոփոխությունները նպաստում են նախկինում ստորագրված փաստաթղթերի կյանքի կոչմանը, որոնք ուղղված են հաշտեցման գործընթացին»,- ընդգծել է Շվեյցարիայի խորհրդարանի ստորին պալատի ղեկավարը: Ընդ որում, Դոմինիկ դե Բումանը նշել է, որ արտաքին հարաբերությունները մեծապես Արտաքին գործերի նախարարության առանձնաշնորհն են, սակայն անհրաժեշտության դեպքում խորհրդարանը մշտական հանձնաժողովների ակտիվ գործունեության միջոցով կարող է դրական ներդրում ունենալ նաեւ այս հարցի լուծման գործում:
Դե Բումանի գործընկեր Արա Բաբլոյանն իր հերթին նշել է, որ ժամանակին հայկական կողմը, չնայած այն հանգամանքին, որ փաստացի 1915 թվականի ցեղասպանության տուժած կողմն է հանդիսանում, եւ չնայած բոլոր մյուս դժվարություններին, պատրաստակամություն հայտնեց կարգավորել հարաբերություններն հարեւան Թուրքիայի հետ՝ առանց որեւէ նախապայմանների:
Սակայն պաշտոնական Անկարան, որը կտրականապես ժխտում է Հայոց ցեղասպանությունը, նախապայմաններ առաջ քաշեց հայկական կողմի համար, ինչը, ըստ Բաբլոյանի, ապացույց դարձավ առ այն, որ Թուրքիան պատրաստ չէ հարաբերություններ հաստատել իր հարեւանների հետ՝ այդպիսով ողջ միջազգային հանրությանը ցույց տալով իր իսկական դեմքը:
