News
Լրահոս
News
Երեքշաբթի
Օգոստոս 14
Տեսնել լրահոսը


«Ելք» խմբակցությունը ստորագրահավաք է սկսում. ուզում են Հարկային օրենսգրքում փոփոխություններ կատարելու համար խորհրդարանի արտահերթ նիստ հրավիրել: Նիկոլ Փաշինյանն այսօր Ազգային ժողովի նիստում խոսել է լայն սպառման ապրանքների թանկացման մասին՝ նշելով, որ դա մեծապես կապված է Հարկային օրենսգրքի հետ: Խմբակցությունն առաջարկում է արտահերթ նիստ հրավիրել փետրվարի 16-ին: Դրա համար 27 պատգամավորի ստորագրություն է պետք: Միքայել Մելքումյանը հայտարարել է, որ 31 պատգամավոր ունեցող «Ծառուկյան» խմբակցությունը նույնպես կմիանա նախաձեռնությանը:

Շարունակելով թանկացումների թեման՝ Սերգեյ Բագրատյանը կառավարությանն է մեղադրել: Տարակուսում է. բարձրացնում են հարկերն ու հայտարարում, որ թանկացումների հետ կապ չունեն: Պատգամավորը գործադիրին ժողովրդի առջեւ ազնիվ լինելու կոչ է արել:

Ազգային ժողովն այսօր մերժել է օրակարգում ընդգրկել Նիկոլ Փաշինյանի եւ Արտաշես Գեղամյանի միջեւ տեղի ունեցած միջադեպի կապակցությամբ էթիկայի ժամանակավոր հանձնաժողով ստեղծելու մասին «Ելք»-ի նախաձեռնությունը: Քվեարկությունից հետո Էդմոն Մարուքյանը հայտարարել է. հանրապետականներն անպատժելիության մթնոլորտ են տարածում:

Խորհրդարանում այսօր անդրադարձ է եղել նաեւ կառավարության նիստերը դռնփակ անցկացնելուն վերաբերող օրինագծին: Գեւորգ Պետրոսյանն ասում է՝ եթե հիմա ժողովրդավարությունից են խոսում, ո՞ւր էին 10 տարի շարունակ, երբ կառավարությունը հակաժողովրդավարական քաղաքականություն էր որդեգրել եւ նիստերը բաց էր անցկացնում:

Դավիթ Հարությունյանը վստահեցնում է, որ նիստերը դռնփակ անցկացնելու դեպքում էլ կառավարության գործունեությունը թափանցիկ կլինի: Նաեւ կարծում է, որ փակ դռների հետեւում կառավարության անդամներն ավելի անկաշկանդ կլինեն քննարկումների ժամանակ: Նախարարը կարծում է, որ կառավարության նիստերին հետեւող լրագրողները ներկայացնում են ոչ թե քննարկվող կարեւոր հարցերը, այլ սկանդալներ են փնտրում: Ի դեպ՝ նիստերը դռնփակ անցկացնելու առաջարկ Դավիթ Հարությունյանն արել է նաեւ նախկին վարչապետին, բայց Հովիկ Աբրահամյանը մերժել է:

Հայաստանի 28 քաղաքներում բնակարաններն էժանացել են, 13-ում՝ թանկացել: Հայաստանյան բնակարանային շուկայում պատկերն այսպիսին է. ամենաէժան տներն ու բնակարանները մեր երկրում Գեղարքունիքի մարզում են, ամենաթանկը՝ Կոտայքում եւ Երեւանում: Մայրաքաղաքում էլ ամենաէժան բնակարանները Նուբարաշենում են, ամենաթանկը՝ Կենտրոն վարչական շրջանում:  2017 թվականի տվյալներով՝ Հայաստանում բնակարանների առքուվաճառքի շուրջ 14 հազար գործարք է կնքվել. սա նախորդող տարվա համեմատ 20 տոկոսով ավելի է: Ընդ որում, գործարքների 81 տոկոսն իրականացվել է Երեւանում:

Աշխարհի ամենահարուստ 500 մարդիկ մեկ օրում 114 մլրդ դոլար են կորցրել: Պատճառն ԱՄՆ ֆոնդային բորսայի կտրուկ անկումն է՝ 3.8-4.6 տոկոսով: Ամենաշատը տուժել է Berkshire Hathaway ընկերության ղեկավար Ուորեն Բաֆեթը. նա մեկ օրում 5.1 մլրդ դոլար է կորցրել: Առաջին եռյակում են նաեւ Facebook-ի եւ Amazon-ի հիմնադիրները: Մարկ Ցուկերբերգը սնանկացել է 3.6 մլրդ դոլարով, Amazon-ի հիմնադիր Ջեֆ Բեզոսը՝ 3.3 մլրդ-ով: Լուրջ կորուստներ են ունեցել նաեւ Microsoft-ի հիմնադիր Բիլ Գեյթսը եւ Google-ի հիմնադիրներ Լարի Փեյջն ու Սերգեյ Բրինը:

Բիթքոինը մեկ օրվա ընթացքում նվազել է 1200 դոլարով: Այսօր 1 բիթքոինն արժե շուրջ 6000 դոլար: Ընդհանուր առմամբ, 8 օրում կրիպտոարժույթը նվազել է 44 տոկոսով: Նշենք, որ 2017 թվականի դեկտեմբերի կեսերին բիթքոինը հատել էր 20 հազար դոլարի սահմանագիծը: Սակայն 2018 թվականի հունվարից տարբեր պետությունների կողմից սահմանափակումներն ազդեցին բիթքոինի արժեքի վրա:

Հենրիխ Մխիթարյանն ընդգրկվել է Անգլիայի առաջնության 26-րդ տուրի խորհրդանշական հավաքականում: Լոնդոնի «Արսենալի» նորեկն այնտեղ հայտնվել է Goal.com-ի եւ Whoscored-ի վարկածներով: Ավելի վաղ Հայաստանի հավաքականի կիսապաշտպանին տուրի խորհրդանշական հավաքականում ընդգրկել էր նաեւ BBC-ն: Նշենք, որ «Էվերտոնի» դեմ Պրեմիեր լիգայի 26-րդ տուրի հանդիպմանը 29-ամյա ֆուտբոլիստն առաջին անգամ հանդես եկավ «Արսենալի» մեկնարկային կազմում: Այդ խաղում Մխիթարյանը հասցրեց 3 գոլային փոխանցման հեղինակ դառնալ, իսկ լոնդոնյան ակումբը հաղթեց 5:1 հաշվով:

Դոլարը շարունակում է արժեւորվել, իսկ եվրոն էժանացել է: Փետրվարի 6-ին դոլարի փոխարժեքը կազմել է 481 դրամ, եվրոյինը՝ 597, ռուբլունը՝ 8 դրամ 44 լումա, ֆունտինը՝ 674 դրամ:

Փետրվարի 7-ին հանրապետությունում սպասվում է առանց տեղումների եղանակ: Օդի ջերմաստիճանն էապես չի փոխվի: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի 0-2 աստիճան ցուրտ, ցերեկը՝ +11+13 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 14.08.2018
ՀՀ երկրորդ նախագահ Ռոբերտ Քոչարյանն այսօր մամուլի ասուլիս էր հրավիրել. այն, սակայն, տապալվել է...
Օրվա գլխավոր լուրերը՝ «մեկ տողով». 13.08.2018
Ռոբերտ Քոչարյանն անձեռնմխելի է. Վերաքննիչ դատարանը բավարարեց երկրորդ նախագահի պաշտպանների միջնորդությունը եւ հենց դատարանի դահլիճից...
Օրվա գլխավոր լուրերը՝ «մեկ տողով». 10.08.2018
Փաշինյանը մեկնաբանել է հայաստանյան վերջին իրադարձությունների հետ կապված Սերգեյ Լավրովի հայտարարությունը, նաեւ անդրադարձել Ռոբերտ Քոչարյանի...
Օրվա գլխավոր լուրերը՝ «մեկ տողով». 09.08.2018
Վերաքննիչ դատարանը սկսել է քննել Ռոբերտ Քոչարյանի խափանման միջոցը փոխելու մասին պաշտպանների միջնորդությունը...
Օրվա գլխավոր լուրերը՝ «մեկ տողով». 08.08.2018
Հովիկ Աբրահամյանի եղբայրը՝ Հենրիկ Աբրահամյանը ձերբակալվել է. նրան կասկածում են ապօրինի կերպով հրազեն ու ռազմամթերք...
Օրվա գլխավոր լուրերը՝ «մեկ տողով». 07.08.2018
Հանրապետական կուսակցությունը հրապարակել է այն պատգամավորների անունները, որոնք ստորագրել են Ռոբերտ Քոչարյանի...
Partner news