«Ելք» խմբակցության պատգամավոր Արամ Սարգսյանը չի բացառում, որ իրենց դաշինքի օրակարգում իշխանափոխությունը կարող է ընդգրկվել մինչեւ ապրիլ: Այս մասին NEWS.am-ի հետ զրույցում ասաց պատգամավորը:
«Իշխանափոխության հարցը ժողովրդի ու մեր օրակարգում կարող է հայտնվել հենց վաղն էլ: Երեկ իմ ընկեր, պատգամավոր Արարատ Միրզոյանը հիշեցրեց Թունիսի պատմությունը, թե ինչպես կանաչի վաճառող երիտասարդի ինքնահրկիզումը դարձավ արաբական աշխարհի ինքնահրկիզումը: Մեր կարգի երկրները նման բաներից ապահովագրված չեն: Ու թանկացումների, սոցիալական անարդարությունների, անընդհատ մնացող իշխանություների պարագայում շատ հնարավոր է, որ հենց վաղն ու մյուս օրն էլ իշխանափոխությունը դառնա օրակարգ»,-ասաց Արամ Սարգսյանը:
Պատգամավորը շեշտեց, որ դա կարող է լինել, երբ հանրության շրջանում ցանկություն լինի. «Իսկ երբ ժամանակից շուտ է դա արվում, փչացնում ես այն ամենը ինչը կարող է տեղի ունենալ»:
Արամ Սարգսյանը դարձյալ պնդեց, որ թանկացումների օրակարգը քաղաքական բնույթի է: «Չեմ համարում, որ թանկացումների դեմ օրակարգը քաղաքական չէ: Այն միանշանակ քաղաքական օրակարգ է: Ես չեմ համարում, որ մենք այսօր հայտարարենք` այ մենք փողոց ենք հրավիրում ժողովրդին իշխանափոխության համար շատ մարդ կլինի, եթե էդպես լիներ, հավատացեք, որ հրավիրողներ շատ կլինեին, որոնք իրենց ավելի ընդդիմադիր են համարում եւ համարում, որ մարդիկ փողոց չեն դուրս գալիս, քանի որ մեզ չեն վստահում»,- ասել է նա: