Արմավիրի մարզի Նորապատ գյուղում երկհարկանի բնակելի շենքի հրդեհից տուժած բնակիչներին կառավարության որոշմամբ յուրաքանչյուր ամիս գումար է հատկացվում: Այս մասին NEWS.am-ի հետ զրույցում ասաց Արմավիրի փոխքաղաքապետ Մելիք Բաղդասարյանը` նշելով, որ որպես վարձավճար հրդեհից տուժած 11 ընտանիքի հատկացվում է 40-60 հազար դրամ:
Մելիք Բաղդասարյանի խոսքով, հրդեհված շենքի հարակից տարածում վրանների մեջ մնացող բնակիչներ այս պահին չկան. «Կառավարության հատկացրած գումարով տուն են վարձել, կեսն էլ իրենց բարեկամների տանն են մնում»:
Նշենք, որ յուրաքանչյուր շնչին հրդեհից հետո հատկացվել էր 160 հազարական դրամ` առաջնային կարիքները հոգալու համար:
Ավելի վաղ NEWS.am-ը հայտնել էր, որ 2017թ. հոկտեմբերի 22-ին, ժամը 22:00-ի սահմաններում ԱԻՆ Փրկարար ծառայության օպերատիվ կառավարման կենտրոն ահազանգ էր ստացվել, որ Նորապատ գյուղի նախկին դատարանի շենքում, որտեղ բնակվում է 14-ից ավելի ընտանիք, խոշոր հրդեհ է բռնկվել: Դեպքի վայր էր մեկնել հինգ մարտական հաշվարկ, արտակարգ իրավիճակների արձագանքման եւ օպերատիվ խմբերը: Հայտարարվել է հրդեհի բարդության 3-րդ աստիճան. դեպքի վայր է մեկնել եւս երեք մարտական հաշվարկ:
Ավելի ուշ հայտնի էր դարձել, որ հրդեհից առաջ ուժեղ պայթյուն է տեղի ունեցել: Շենքը երկհարակնի է եւ այն ամբողջովին վերածվել է մոխրակույտի: