Հայաստանը մտադիր է 2017 թվականի համեմատությամբ 2018-ին էկոտուրիստների թիվը 20 տոկոսով մեծացնել: Այս մասին փետրվարի 7-ին մամուլի ասուլիսի ժամանակ հայտնեց բնապահպանության փոխնախարար Խաչիկ Հակոբյանը:
Նրա խոսքով՝ նույնքան էլ կմեծանան էկոտուրիստների այցելություններից ստացված եկամուտները: «Ժամանակակից տեխնոլոգիաների օգտագործմամբ հատուկ պահպանվող բնական տարածքների կատարելագործումը 2018 թվականին կդառնա նախարարության գործունեության առաջնահերթ ուղղություններից մեկը»,- նշեց Խաչիկ Հակոբյանը՝ շարունակելով, որ այս նպատակի համար Հայաստանի Բնության պետական թանգարանում ապրիլի վերջին կբացվի էկոտուրիզմի աջակցության տեղեկատվական կենտրոն, որը հնարավորություն կտա այցելուներին ներկայացնել երկրի էկոտուրիստական ամբողջ պոտենցիալը, տեղեկություններ կտրամադրի Հայաստանի հատուկ պահպանվող բնական տարածքների եւ այնտեղ այցելելու շրջանակում տրամադրվող ծառայությունների մասին:
«Էկոտուրիզմի զարգացման համար աշխատանքներ են կատարվում նաեւ միջազգային տուրպորտալներում Հայաստանի էկոտուրիստական երթուղիների մասին տեղեկությունների տեղադրման ուղղությամբ, ինչպես նաեւ թարմացվում են Վիքիպեդիայում հրապարակված մեր երկրի հատուկ պահպանվող բնական տարածքների մասին հոդվածները»,- նշեց նա: