News
Լրահոս
News
Երեքշաբթի
Օգոստոս 14
Տեսնել լրահոսը

Նախագահ Սերժ Սարգսյանն այսօր ընդունել է Շվեյցարիայի Համադաշնության Ազգային խորհրդի նախագահ Դոմինիկ դը Բյումանի գլխավորած պատվիրակությանը, որի կազմում էին Ազգային խորհրդի ղեկավարի տեղակալները, խորհրդարանում ներկայացված բոլոր խմբակցությունների ներկայացուցիչները:

Ողջունելով հյուրերին՝ Հանրապետության Նախագահը նշել է, որ բարեկամ Շվեյցարիայից այսպիսի ներկայացուցչական պատվիրակության այցը Հայաստան մեկ անգամ եւս վկայում է հայ-շվեյցարական հարաբերությունների բարձր մակարդակի, ինչպես նաեւ երկու ժողովուրդների փոխադարձ համակրանքի մասին: Նախագահ Սարգսյանը գոհունակությամբ է խոսել մշտապես վերընթաց զարգացող երկկողմ միջպետական հարաբերությունների մասին եւ վստահություն հայտնել, որ պատվիրակության հագեցած օրակարգով այցն անպայմանորեն իր ազդեցությունը կունենա հայ-շվեյցարական համագործակցության ամրապնդման վրա:

Սերժ Սարգսյանը շնորհավորել է Դոմինիկ դը Բյումանին՝ անցած տարեվերջին Շվեյցարիայի Ազգային խորհրդի նախագահի պաշտոնում ընտրվելու կապակցությամբ եւ մաղթել նրան բեղմնավոր աշխատանք: Նախագահը երախտագիտություն է հայտնել Դոմինիկ դը Բյումանին՝ մինչ այժմ հայ-շվեյցարական կապերի ամրապնդման գործում նրա հետեւողական աշխատանքի եւ նվիրումի համար: Ընդգծելով, որ Շվեյցարիան Հայաստանի համար մշտապես եղել է վստահելի գործընկեր, Նախագահ Սարգսյանը շնորհակալություն է հայտնել բարեկամ Շվեյցարիային՝ Հայաստանի համար բոլոր դժվարին պահերին հայ ժողովրդի կողքին լինելու եւ աջակցելու համար:

Հանրապետության Նախագահը եւ Շվեյցարիայի Ազգային խորհրդի նախագահը միջպետական հարաբերությունների զարգացման գործում երկուստեք կարեւորել են միջխորհրդարանական համագործակցության դերը, որը, ըստ զրուցակիցների, լավագույնս լրացնում է միջպետական օրակարգը՝ յուրովի նպաստելով ժողովուրդների բարեկամության ամրապնդմանը։ Այդ համատեքստում Սերժ Սարգսյանը խորհրդանշական է համարել, որ հետաքրքիր զուգադիպությամբ Հայաստանի եւ Շվեյցարիայի խորհրդարանական բարեկամության խմբերի նախկին նախագահներն այժմ ղեկավարում են Հայաստանի եւ Շվեյցարիայի օրենսդիր մարմինները, ինչը կրկնակի պարտավորեցնում է խորացնել կապերը երկու երկրների խորհրդարանների միջեւ:

Զրուցակիցները հայ-շվեյցարական առնչությունների սերտացման համար մեկ այլ կարեւոր հարթակ են համարել Ֆրանկոֆոնիայի միջազգային կազմակերպությունը, որի նախագահությունը ստանձնել է Հայաստանը, եւ հույս հայտնել, որ այս տարվա հոկտեմբերին Երեւանում կայանալիք Ֆրանկոֆոնիայի գագաթնաժողովը կանցնի բարձր մակարդակով:

Սերժ Սարգսյանը եւ Դոմինիկ դը Բյումանը կարեւորել են երկու երկրների խորհրդարանականների սերտ համագործակցությունը միջազգային հարթակներում: Նախագահ Սարգսյանն առանձնահատուկ բարձր է գնահատել 2012 թվականին Դոմինիկ դը Բյումանի գլխավորությամբ Շվեյցարիայի խորհրդարանականների բարեկամական խմբի այցը Արցախ՝ նշելով, որ նման այցերը թույլ են տալիս տեղում եւ անձամբ ծանոթանալ իրավիճակին:

Հանդիպմանը Նախագահ Սերժ Սարգսյանը եւ Շվեյցարիայի Ազգային խորհրդի նախագահ Դոմինիկ դը Բյումանը մտքեր են փոխանակել ԼՂ հիմնախնդրի խաղաղ կարգավորման բանակցային գործընթացի շուրջ: Հանրապետության Նախագահը շնորհակալություն է հայտնել Շվեյցարիայի Համադաշնությանը այս հիմնահարցում հավասարակշռված դիրքորոշման, ԵԱՀԿ ՄԽ-ի համանախագահներին աջակցելու ու խնդրի հանգուցալուծմանը նպաստելու պատրաստակամության եւ ջանքերի համար:

!
Այս նյութը հասանելի է նաև   English and Русский
Տպել
Partner news