2017թ. օգոստոսի 7-ից 31-ը հանրապետության ողջ տարածքում եւ սեպտեմբերի 11-ից 17-ը ներառյալ Արարատի, Արմավիրի եւ Վայոց Ձորի մարզերում անց է կացվել «Կանեփ-կակաչ-2017» համալիր օպերատիվ-կանխարգելիչ միջոցառումը:
Միջոցառման նպատակն էր` հայտնաբերել եւ ոչնչացնել հանրապետության տարածքում վայրի աճած կամ բնակչության կողմից ապօրինի աճեցված կանեփի եւ կակաչի բույսերը, ինչպես նաեւ թմրամիջոցների ապօրինի շրջանառության դեպքերի հայտնաբերումը, կանխումը, խափանումը եւ բացահայտումը:
Միջոցառման անցկացման ընթացքում հայտնաբերվել եւ այրման միջոցով ոչնչացվել է 83 տոննա 837 կգ վայրի աճած կանեփի եւ 59,5 կգ կակաչի կանաչ զանգված /«Կանեփ-կակաչ-2016» ամբողջ միջոցառման ընթացքում` 73 տոննա 780կգ կանեփի եւ 56,5 կգ կակաչի կանաչ զանգված/:
Տնամերձ 21 հողամասերից հայտնաբերվել է ապօրինի աճեցված 136,1 կգ կշռով կանեփի 2547 բույս /2016թ.` 20 հողամասերից 186,7 կգ կշռով 757 բույս/:
Բացի վերոգրյալը, ստացված օպերատիվ տեղեկությունների իրացման արդյունքում ապօրինի շրջանառությունից առգրավվել է 3424,32 գրամ «մարիխուանա», 4 մլ. «դեզոմորֆինով լուծույթ», 49,3 գրամ «կոկաին», 0,5 գրամ «մետամֆետամին», 9,15 գրամ «սփայս», ինչպես նաեւ տարբեր տեսակի հոգեմետ 13 հաբ:
Միջոցառման շրջանակներում ձեռնարկված օպերատիվ-հետախուզական միջոցառումների արդյունքում առգրավվել է 2 միավոր հրազեն, որից 1 հատ «Մակարով» տիպի ատրճանակ՝ 8 փամփուշտով, 1 հատ «COMBAT-PP» գազային ատրճանակ` 6 փամփուշտով 15 հատ «ԱԿՄ» տիպի ինքնաձիգի եւ 26 հատ «ԱԿ-74» տիպի ինքնաձիգի փամփուշտներ, 8 հատ ազդանշանային ատրճանակի փամփուշտ, 4 հատ 9 մմ. տրամաչափի փամփուշտ, 1 փամփշտատուփ:
Կատարված բացատրական աշխատանքների շնորհիվ կամովին հանձնվել է 28 միավոր հրազեն, որից` 2 նռնականետ, 9 փամփշտատուփ, 36 նռնակ, 4 հրապայթուցիչ, 1 գնդացիր, 62 պայթուցիչ, 2 հրազենի փող եւ 3889 հատ տարբեր տրամաչափի փամփուշտ:
Միջոցառման ընթացքում ձեռնարկված օպերատիվ-հետախուզական միջոցառումների եւ բացատրական աշխատանքների արդյունքում հայտնաբերվել է 107 հետախուզվող, թմրամիջոց գործածելու համար վարչական պատասխանատվության է ենթարկվել 26 անձ:
«Կանեփ-կակաչ-2017» համալիր օպերատիվ-կանխարգելիչ միջոցառման ընթացքում հայտնաբերված հանցագործությունների կապակցությամբ ընդհանուր առմամբ հարուցվել է 42 քրեական գործ, հիմնականում ՀՀ քրեական օրենսգրքի 266 եւ 288 հոդվածների հատկանիշներով:
