ՀՀԿ-ի նախագահի թեկնածու Արմեն Սարգսյանի «նախընտրական» հանդիպումներն այս շաբաթ կավարտվեն։ Խորհրդարանական ուժերից «Ելք» եւ «Ծառուկյան» խմբակցությունների հետ նրա հանդիպումը նախատեսված է այս շաբաթվա վերջին։
Ուշագրավ է «Ծառուկյան» խմբակցության հետ հանդիպման ձեւաչափը։ NEWS.am-ին հայտնի է դարձել, որ հանդիպումը խմբակցության ղեկավարի եւ պատգամավորների հետ տեղի կունենա առանձին-առանձին։ Նախ Արմեն Սարգսյանը կհանդիպի Գագիկ Ծառուկյանի, հետո արդեն՝ խմբակցության պատգամավորների հետ։ Ծառուկյանը չի ցանկացել իշխանության թեկնածուին իր հարցերն ուղղել պատգամավորների ներկայությամբ։
Իսկ մինչ քվեարկությունն արդեն որոշվել է. խմբակցությունը միաձայն կողմ է քվեարկելու ՀՀԿ-ի թեկնածուին։ Նրա նկատմամբ հիացմունքը որոշ պատգամավորներ արդեն հայտնել են։ Օրեր առաջ Վարդան Բոստանջյանը NEWS.am-ի հետ զրույցում հայտարարել էր, որ Արմեն Սարգսյանը նախագահի արժանի թեկնածու է։ Հիշեցնենք, որ Արմեն Սարգսյանը հանդիպումներից հետո պետք է Սերժ Սարգսյանին պատասխանի՝ ընդունելո՞ւ է ՀՀԿ-ի կողմից առաջադրվելու առաջարկը, թե՞ ոչ։