Հայաստանում ոռոգվող հողերի խոշոր տարածքները գործնական օգտագործման շատ ցածր մակարդակ ունեն: Այս մասին փետրվարի 8-ին ՀՀ կառավարության նիստին հայտարարեց վարչապետ Կարեն Կարապետյանը:
Նա նշեց, որ միայն Արարատյան հովտում 24 հազար հեկտար նման հողատարածք կա:
«Այս հողերն իրավաբանական եւ ֆիզիկական անձանց են պատկանում, ընդ որում, գործող օրենսդրությունը հողօգտագործման խթանման, գյուղատնտեսական հողերի չօգտագործման համար պատասխանատվության ենթարկման, ինչպես նաեւ հողային սեփականության նկատմամբ իրավունքի կասեցման վերաբերյալ հստակ հայեցակարգային մեխանիզմներ չի նախատեսում»,- ասաց Կարեն Կարապետյանը:
Հաշվի առնելով վերը նշվածը՝ վարչապետը հանձնարարել է ՀՀ տարածքային կառավարման եւ զարգացման նախարար Դավիթ Լոքյանին, գյուղատնտեսության նախարար Իգնատի Առաքելյանին, Ջրային տնտեսության պետական կոմիտեի նախագահ Արսեն Հարությունյանին եւ մարզային վարչակազմների ղեկավարներին մեկ ամսվա ընթացքում համատեղ մշակել ու կառավարությանը ներկայացնել առաջարկներ ոռոգվող գյուղատնտեսական հողերի օգտագործման խթանման, չօգտագործման համար պատասխանատվության ենթարկման մեխանիզմների վերաբերյալ, ինչպես նաեւ պարզեցնել հողային սեփականության իրավունքի կասեցման կարգը:
«Սա խնդիր է, քանի որ մենք ջանք չենք խնայում ոռոգվող տարածքների ավելացման համար, մինչդեռ արդեն գոյություն ունեցող հողերն այս գործընթացից դուրս են մնացել»,- նշեց վարչապետը:
