20 հոգուց բաղկացած խումբը ներխուժել է Իսպանիայի հարավում գտնվող հիվանդանոց, որպեսզի ազատի այնտեղ գտնվող ձերբակալված նարկոդիլերին, հաղորդում է Europa Press գործակալությունը։

Միջադեպը տեղի է ունեցել Կադիս նահանգի Լա Լինեսա դե լա Կոնսելսիոն քաղաքում այն բանից հետո, երբ ոստիկանությանը հաջողվել է ձերբակալել Լաս Կաստանիտաս կլանին պատկանող նարկոդիլերին։ Ձերբակալվելուց հետո նա տեղափոխվել էր հիվանդանանոց իրավապահ մարմիններից փախչելու փորձի ժամանակ  ստացած վնասվածքների պատճառով։

Երեքշաբթի հիվանդանոց ներխուժած խումբը հարձակվել էր երկու ոստիկանների վրա եւ իր հետ հանել ձերբակալվածին։ Մի քանի ժամ անց ոստիկաններին հաջողվել է ձերբակալել խմբի անդամներից մեկին։ Աշխատանքներ են տարվում մյուսներին ձերբակալելու ուղղությամբ։