Ադրբեջանում արտահերթ նախագահական ընտրություններ անցկացնելու Ալիեւի որոշումը ավելի շուտ լուրջ հանգամանքներով է պայմանավորված: Այս մասին փետրվարի 9-ին լրագրողների հետ հանդիպման ժամանակ ասաց արտակարգ եւ լիազոր դեսպան Արման Նավասարդյանը:
Այսպես, նրա խոսքով, Ալիեւը ցանկանում է օգտվել այն դրական իրավիճակից, որը նավթի գների հետ կապված ստեղծվել է համաշխարհային շուկայում:
«Դրանք առայժմ բարձր են, Ալիեւը ցանկանում է արտահերթ ընտրություններ անցկացնել, քանի որ տեղեկություններ կան, որ ընտրություններից հետո, սեպտեմբերին եւ նոյեմբերին նավթի գները դարձյալ նվազելու են»,- պարզաբանեց Նավասարդյանը:
Փորձագետի կարծիքով, դրանից բացի, Ալիեւը ցանկացել է ընդդիմությանը հանկարծակիի բերել՝ նրան հնարավորություն չտալով նախագահական ընտրություններին պատշաճ պատրաստվել, չնայած, ըստ Նավասարդյանի, ադրբեջանական ընդդիմությունն առանց այն էլ գործող իշխանության դեմ քաղաքական պայքարի լուրջ պոտենցիալ չունի:
Ինչպես նշեց Նավասարդյանը, որոշ փորձագետներ կարծում են, որ Ալիեւն այս քայլին է դիմել, որ ընտվելուց անմիջապես հետո Լեռնային Ղարաբաղում վերսկսի ռազմական գործողությունները, սակայն նա դա քիչ հավանական է համարում, քանի դրա համար լուրջ քաղաքական եւ տնտեսական նախադրյալներ չկան:
Դրա հետ միաժամանակ, փորձագետի կարծիքով, Ալիեւը սպասում է Ռուսաստանում նախագահական ընտրություններին, քանի որ պետք է իր համար որոշի, թե հետագայում իր արտաքին քաղաքականությունը ինչպես է վարելու Մոսկվայի եւ Վաշինգթոնի նկատմամբ, քանի որ վերջինների միջեւ հարաբերությունները ծայրահեղ լարված են, եւ նա, վաղ թե ուշ, պետք է որեւէ մեկի կողմում լինի:
