News
Լրահոս
News
Ուրբաթ
Օգոստոս 17
Տեսնել լրահոսը


Ստեփանակերտի զինվորական հոսպիտալում փետրվարի 8-ին հիվանդության հետեւանքով զինծառայող է մահացել: 18-ամյա Հայկ Հակոբյանի մահվան պատճառը, նախնական ախտորոշմամբ, կայծակնային զարգացած մինինգոկոկցեմիան է: Մենինգոկոկային ինֆեկցիան սուր վարակիչ հիվանդություն է, որը որոշ դեպքերում կարող է ընթանալ առանց ակնհայտ ախտանշանների: Զինծառայողի մահվան մանրամասները պարզելու համար քննություն է կատարվում:

Արտերկրում հայ համայնքների հետ հանդիպումներից հետո Արմեն Սարգսյանը Հայաստան է վերադարձել եւ այսօր խորհրդարանում հանդիպել «Ելք» խմբակցության պատգամավորներին: Ավելի վաղ «Ելք»-ի ներկայացուցիչները հայտարարել էին, որ այս հանդիպումը ոչինչ չի փոխելու. իրենք, միեւնույն է, դեմ են քվեարկելու Հանրապետականի նախագահի թեկնածուին: Ամեն դեպքում, հանդիպման ժամանակ ընդդիմադիր պատգամավորներն Արմեն Սարգսյանի հետ մի շարք հարցեր են քննարկել: Նիկոլ Փաշինյանը պատմել է, որ խոսել են, մասնավորապես, մարտի 1-ից, երկրի ապագայի շուրջ նախագահի թեկնածուի տեսլականից, Սահմանադրության փոփոխություններով պայմանավորված՝ նախագահի լիազորությունների զգալի կրճատումից: Այլ մանրամասներ հայտնել, սակայն, Փաշինյանը չի ցանկացել. կոռեկտ չի համարում:

Հանդիպումից հետո լրագրողները Արմեն Սարգսյանին հարցրել են մամուլում շրջանառվող լուրերի մասին, թե նախագահի թեկնածուն նաեւ Մեծ Բրիտանիայի քաղաքացիություն ունի: Նախագահի պաշտոնը զբաղեցնելուն դա կխանգարի: Սարգսյանը վստահեցրել է, որ բրիտանական հպատակությունից վաղուց է հրաժարվել: Իսկ Մեծ Բրիտանիայի քաղաքացիություն ստանալու համար դիմել է, քանի որ գործի բերումով շատ էր շրջագայում, բրիտանական հպատակությունն օգնում էր: Հրաժարվելիս էլ չի մտածել, որ մի օր Հայաստանում Սահմանադրություն են փոխելու եւ իրեն նախագահի պաշտոն են առաջարկելու: Քաղբանտարկյալների մասին հարցին էլ փորձառու դիվանագետը փորձել է դիվանագիտորեն պատասխանել. կան անհատներ, որոնք հասարակության կողմից գնահատվում են որպես քաղբանտարկյալ:

Նշենք, որ խորհրդարանական ուժերից Արմեն Սարգսյանը դեռ պետք է հանդիպի «Ծառուկյան» խմբակցության հետ: Այսօր նախատեսված հանդիպումը հետաձգվել է, հավանաբար տեղի կունենա հաջորդ շաբաթ: Չնայած սրան՝ «Ծառուկյան» խմբակցությունը, մեր տեղեկություններով, որոշել է նրա թեկնածության օգտին քվեարկել: Իսկ այսօր Արմեն Սարգսյանն Արցախ է մեկնել. հանդիպելու է երկրի քաղաքական եւ հոգեւոր ղեկավարության հետ: 

Ժիրայր Սեֆիլյանի եւ մյուսների գործով մեղադրողն այսօր հանդես է եկել մեղադրական ճառով: Շուշիի առանձնակի գումարտակի հրամանատար Ժիրայր Սեֆիլյանի համար Հակոբ Ենոքյանը 11 տարվա ազատազրկում է պահանջել. սա անսպասելի էր պաշտպանական կողմի համար: Մեղադրողը Սեֆիլյանի եւ մյուսների դեմ ցուցմունք տված ամբաստանյալներից Հովհաննես Պետրոսյանի համար ընդամենը 2 տարվա ազատազրկում է պահանջել՝ նշելով, որ նրա նկատմամբ որպես մեղմացուցիչ հանգամանք է դիտարկվել հանցագործության բացահայտմանն օժանդակելն ու անչափահաս երեխաների հայր լինելը: Սա զայրացրել է ամբաստանյալներից Ներսես Պողոսյանին: Ժիրայր Սեֆիլյանն էլ այսօր դատարանի նկատմամբ դժգոհություն է հայտնել եւ լքել նիստերի դահլիճը:

Ստավրոպոլի երկրամասում հայտնաբերել են հայ գործարար Գեւորգ Բազինյանի գլխատված դին: 64-ամյա Բազինյանն անցած տարվա հոկտեմբերից անհետ կորած էր համարվում: Տղամարդը սեփական մեքենայով դուրս է եկել աշխատավայրից, ինչից հետո ոչ ոք նրան չի տեսել: Բազինյանի մեքենան, սակայն, նույն օրը երեկոյան գտել են: Աղբյուրների համաձայն՝ դիակի վրա խոշտանգման հետքեր կան՝ կապտուկներ եւ կտրվածքներ: Բազինյանին գլխատել են, իրավապահները զոհի գլուխը դեռ չեն գտել: Որպես կատարվածի հիմնական վարկած իրավապահները դիտարկում են պատվիրված սպանությունը: Գեւորգ Բազինյանը խմելու ջրի եւ ալկոհոլային խմիչքների արտադրությամբ զբաղվող Նովոպավլովսկի ձեռնարկություններից մեկի տնօրենն էր:

Ողբերգական դեպք Երեւանում. կեսգիշերն անց Իսակովի պողոտայի շենքերից մեկի մոտ ավտոտնակում դիեր են հայտնաբերել: Կայանված Opel-ում գտել են 39-ամյա Հակոբ Վ.-ի եւ 41-ամյա Լուսինե Ա.-ի մարմինները: Տղամարդուն, ի դեպ, ոստիկանությունը երեկվանից որոնում էր որպես անհետ կորած: Նրա անհետանալու մասին իրավապահներին հայտնել էր կինը: Դատաբժշկի նախնական եզրակացությամբ՝ նրանք մահացել են շմոլ գազից թունավորումից. ավտոտնակի մուտքի դռները ներսից փակ են եղել, մեքենայի շարժիչը՝ գործարկված, իսկ տաքացուցիչները միացված են եղել:

Նմանատիպ դեպք տեղի է ունեցել նաեւ Գյումրիում: Քաղաքի հյուրանոցներից մեկի հարեւանությամբ, դարձյալ ավտոտնակում, մեքենայում հայտնաբերել են 27-ամյա կնոջ եւ 30-ամյա տղամարդու դիերը: Երիտասարդների մահվան պատճառը հայտնի չէ:

2017 թվականին ապօրինի ծառահատումների եւ կաշառքի գործով 11 պաշտոնատար անձի մեղադրանք է առաջադրվել: Պարզվում է՝ բնապահպանության նախարարության պաշտոնյաներն ու անտառապետերը երկար ժամանակ «աչք են փակել» ապօրինի ծառահատումների դեպքերի վրա: Փոխարենը խոշոր չափերի կաշառք են ստացել: Պաշտոնատար անձանց գործողությունների արդյունքում պետությանը 1.5 մլրդ դրամի վնաս է հասցվել: Նրանցից 8-ը կալանավորված են, 3-ը ստորագրությամբ ազատ են արձակվել: Մեղադրանքը հաստատվելու դեպքում նրանց առնվազն 7 տարի ժամկետով ազատազրկում է սպառնում: Միաժամանակ, գլխավոր դատախազն այսօր հայտնել է, որ ապօրինի ծառահատումների դեպքերով անցյալ տարի իրականացվել է այնքան քրեական հետապնդում, որքան 2011-2016 թվականների ընթացքում:

Հարավային Կորեայում մեկնարկել են 23-րդ ձմեռային Օլիմպիական խաղերը: Բացման արարողությունը տեղի է ունեցել Փհենչհանի նորակառույց մարզադաշտում: Հայաստանը Փհենչհան-2018-ում 3 ներկայացուցիչ ունի՝ դահուկորդներ Միքայել Միքայելյանը, Կատյա Գալստյանը եւ լեռնադահուկորդ Աշոտ Կարապետյանը: Հայ մարզիկների մրցելույթները փետրվարի 13-ին են: Այս տարվա ձմեռային Օլիմպիադային, ի դեպ, 15 մարզաձեւերում կվիճարկվի մեդալների 102 հավաքածու: Փհենչհան 2018-ին ռեկորդային թվով մարզիկներ են մասնակցելու. 2925 մարզիկ՝ 92 երկրից: Սա ռեկորդային ցուցանիշ է ձմեռային Օլիմպիական խաղերի պատմության մեջ: Առաջին անգամ ձմեռային Օլիմպիական խաղերին կմասնակցեն Մալայզիայի, Սինգապուրի, Էկվադորի, Նիգերիայի, Կոսովոյի եւ Էրիթրեայի մարզիկները:

Իսկ դոփինգային սկանդալի կենտրոնում հայտնված ռուսաստանցի 45 մարզիկներ ու 2 մարզիչներ այդպես էլ չկարողացան Փհենչհան հասնել: Մարզական արբիտրաժային դատարանը նրանց մասնակցությունն արգելող որոշում է կայացրել: Համաշխարհային հակադոփինգային գործակալությունը եւ Միջազգային օլիմպիական կոմիտեն ողջունել են դատարանի որոշումը՝ նշելով դոփինգի դեմ պայքարի հարցում նրա աջակցության կարեւորությունը:

Փետրվարի 9-ին դոլարն ու եվրոն թանկացել են: Դոլարի փոխարժեքն այսօր արդեն կազմել է 483 դրամ, եվրոյինը՝ 592, ռուբլունը՝ 8 դրամ 32 լումա, ֆունտինը՝ 672 դրամ:

Փետրվարի 10-ին հանրապետությունում սպասվում է առանց տեղումների եղանակ, 11-13-ը ժամանակ առ ժամանակ տեղումներ կլինեն: Օդի ջերմաստիճանն աստիճանաբար 4-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի -1+1, ցերեկը՝ +13+15 աստիճան տաքություն:

Տպել
Կարդացեք նաև
Ամբողջը
Օրվա գլխավոր լուրերը՝ «մեկ տողով». 16.08.2018
Տապալված մամուլի ասուլիսից հետո Ռոբերտ Քոչարյանն առաջին հարցազրույցն է տվել եւ հայտարարել, որ քաղաքականություն է վերադարձել...
Օրվա գլխավոր լուրերը՝ «մեկ տողով». 15.08.2018
Առողջապահության նախարարությունում ռումբի մասին կեղծ ահազանգի հեղինակն առողջական խնդիրներ ունեցող քաղաքացի է...
Օրվա գլխավոր լուրերը՝ «մեկ տողով». 14.08.2018
ՀՀ երկրորդ նախագահ Ռոբերտ Քոչարյանն այսօր մամուլի ասուլիս էր հրավիրել. այն, սակայն, տապալվել է...
Օրվա գլխավոր լուրերը՝ «մեկ տողով». 13.08.2018
Ռոբերտ Քոչարյանն անձեռնմխելի է. Վերաքննիչ դատարանը բավարարեց երկրորդ նախագահի պաշտպանների միջնորդությունը եւ հենց դատարանի դահլիճից...
Օրվա գլխավոր լուրերը՝ «մեկ տողով». 10.08.2018
Փաշինյանը մեկնաբանել է հայաստանյան վերջին իրադարձությունների հետ կապված Սերգեյ Լավրովի հայտարարությունը, նաեւ անդրադարձել Ռոբերտ Քոչարյանի...
Օրվա գլխավոր լուրերը՝ «մեկ տողով». 09.08.2018
Վերաքննիչ դատարանը սկսել է քննել Ռոբերտ Քոչարյանի խափանման միջոցը փոխելու մասին պաշտպանների միջնորդությունը...
Partner news