Գերմանիայի կանցլեր Անգելա Մերկելը փախստականնների բաշխման քվոտաների հարցով Բրյուսելի եւ Վարշավայի միջեւ վեճի հաջող կարգավորման հույս ունի: Այս մասին նա հայտարարել է փետրվարի 10-ի իր վիդեոելույթում, փոխանցում է ՏԱՍՍ-ը:
«Փախստականների բաշխման հարցով մեր պատկերացումները տարբեր են: Պետք է շարունակել բանակցությունները այս հարցով: Ես հույս ունեմ, որ մենք կգտնենք համերաշխ եւ եվրոպական լուծում»,-ասել է կանցլերը Լեհաստանի վարչապետ Մատեուշ Մորավեցկիի Բեռլին այցի նախօրեին (փետրվարի 16-ին):
«Մենք, դառնալով ԵՄ անդամ, պարտավորություն ենք ստանձնել հետեւել իրավական սկզբունքներին: Եթե այդ հարցով կան ինչ-ինչ հարցեր, մտավախություններ կամ քննադատություն, ապա դրանք պետք է ինտենսիվորեն քննարկել»,-հավելել է կանցլերը:
Խոսելով Լեհաստանում ընդունված օրենքի մասին, որի շրջանակներում քրեական պատիժ է սահմանվում «լեհական մահվան ճամբարներ» արտահայտությունը օգտագործելու համար՝ Մերկելը նշել է, որ Հոլոքոստի ժամանակ տեղի ունեցածի համար գերմանացիներն են պատասխանատվություն կրում:
