Քալիֆորնիայից ընտանիքը Starbucks ընկերությանը դատի է տվել բաժակի մեջ արյան առկայության պատճառով, որից պատահաբար մեկ կում խմել է նրանց 2-ամյա դուստրը: Հաճախորդները սրճարանային հսկայից բարոյական վնասի եւ հետազոտության նյութական ծախսերի փոխհատուցում են պահանջում, հայտնում է USA.one-ը:
2016 թվականի փետրվարին հայցվորներ Ամանդա եւ Լուիս Վայսերը, նրանց դուստրը եւ տղամարդու մայրը մտել են Սան Բերնարդինոյի 601 W. 2nd Street հասցեում գտնվող սրճարան: Պատվերը ստանալով՝ ընտանիքի անդամներից մեկը բաժակի մեջ արյան բիծ է նկատել եւ հեղուկից եկող հատուկ մետաղական հոտ զգացել: Մյուս բաժակները զննելով՝ պարզել են, որ դրանք եւս արյամբ են կեղտոված, ըստ որում՝ ըմպելիքից մեկը դուստրն արդեն սկսել էր խմել:
Ընտանիքն ընկերությունից պահանջել է, որ աշխատակիցն անմիջապես արյան անալիզ հանձնի: Դատական նյութերի համաձայն՝ Starbucks-ի մենեջերը խոստացել է նրանց պահանջը բավարարել, սակայն արդյունքն այդպես էլ չի տացվել:
Այդ ժամանակ տուժողները որոշել են իրենք ստուգվել: Չնայած ՄԻԱՎ անալիզները բացասական են եղել, տուժածները չափազանց անհանգստացած էին:
Միջադեպից հետո Starbucks ընկերությունն առաջարկել է նրանցից յուրաքանչյուրին 1000-ական դոլար փոխհատուցում վճարել, սակայն Վայս ամուսինները հրաժարվել են: Դրա փոխարեն նրանք դիմել են Frish Law Group իրավաբանական ընկերությանը, որը դատարանում կներկայացնի նրանց շահերը:
