Ան-148 ինքնաթիռի կործանման վայրում հայտնաբերվել է «սեւ արկղերից» մեկը, հայտնում է «ՏԱՍՍ»-ը՝ վկայակոչելով Արտակարգ իրավիճակների նախարարությունը: Բացի այդ, ԶԼՄ-ներում հակասական տվյալներ են հայտնվել ավիակարգավարների՝ կործանված ինքնաթիռի օդաչուների հետ բանակցությունների մասին: Gazeta.ru-ի փոխանցմամբ՝  Ան-148-ի օդաչուները կարգավարներին տեղեկացրել են անսարքության մասին: Նրանք պետք է արտակարգ վայրէջք կատարեին Ժուկովսկու օդանավակայանում: Պարբերականը վկայակոչում է հետաքննության ընթացքին ծանոթ աղբյուրը:

Սակայն Mash տելեգրամ ալիքը հաղորդել է, որ քննիչները հարցաքննել են «Դոմոդեդովո» օդանավակայանի ավիակարգավարին եւ պատմել, որ ինքնաթիռը բարեհաջող թռիչք է կատարել, սակայն 70-րդ էշելոնի մոտ հանկարծ սկսել է ցած իջնել: Օդանավը կապի այլևս դուրս չի եկել, օդաչուներն այլևս չեն պատասխանել կարգավարներին:

Համացանցում հայտնվել է կարգավարների և օդաչուների միջեւ բանակցությունների ձայնագրությունը: Նրանք կանրում են Սարատով-703 օդանավը, որը պատասխան չի տալիս:

Ավելի վաղ նաեւ նշվել էր, որ ուղղաթիռի բեկորները, որը, ինչպես հաղորդում են ԶԼՄ-ները, կարող էր բախված լիենլ Ան-148 ինքնաթիռի հետ, կործանման վայրում չեն հայտնաբերվել: «Փրկարարներն ուղղաթիռի բեկորներ չեն գտնում»,- ասել է գործակալության աղբյուրը:

Ան-148 ինքնաթիռը վայրէջք է կատարել թռիչքից 4 րոպե անց: «Նախնական տվյալներով՝ Ան-148 ինքնաթիռը թռիչք է կատարել փետրվարի 11-ին՝ Մոսկվայի ժամանակով ժամը 14:24-ին, սակայն Մոսկվայի ժամանակով 14:28-ին անհետացել է ռադարներից եւ ընկել Մերձմոսկվայի Ռամենսկի շրջանում»,- նշել է աղբյուրը:

Ինքնաթիռում 65 ուղեւոր եւ անձնակազմի 6 անդամ է եղել, բոլորը մահացել են: Հաղորդվել է նաև, որ Մերձմոսկվայում կործանված Ան-148 ինքնաթիռի հրամանատար Վալերի Գուբանովը 5000 թռիչքային ժամ է ունեցել, տեղեկացրել է «Սարատովյան ավիաընկերության» մամուլի ծառայության ղեկավար Էլենա Վորոնովան:

«Օդանավի հրամանատար Գուբանով Վալերի Իվանովիչը ծնվել է 1966 թվականին, սովորել է Տամբովի ավագ օդաչուների բարձրագույն ավիացիոն ուսումնարանում: Վալերի Իվանովիչն այս տիպի ինքնաթիռով 2800 թռիչքային ժամ է ունեցել, իսկ ընդհանուր առմամբ՝ 5000 թռիչքային ժամ»,- նշել է գործակալության զրուցակիցը: