Հայաստանում տեղի է ունենում վարչապետի ձեռքում իշխանության անտեղի կենտրոնացում: Փետրվարի 12-ին ԱԺ-ում ավանդական ճեպազրույցների ժամանակ այսպիսի կարծիք հայտնեց «Ելք» խմբակցության ղեկավար Նիկոլ Փաշինյանը:
Նրա կարծիքով՝ սա կարող է Հայաստանի եւ նրա ապագա զարգացման համար քաղաքական շատ լուրջ խնդիրներ ստեղծել
«Սա ինձ չափազանց մտահոգում է»,- ասաց Փաշինյանը՝ հիշեցնելով, որ փետրվարի 16-ին իրենք արտահերթ նիստ են հրավիրել՝ կապված թանկացումների հետ, սակայն վստահ չէ, որ ՀՀԿ-ն կներկայանա նիստին:
Լրագրողների հարցին՝ կարո՞ղ է արդյոք ապագա նախագահը, հաշվի առնելով այն լիազորությունները եւ արտոնությունները, որ ունենալու է վարչապետը, երկրում ինչ-որ բան փոխել՝ հատկապես, որ նախագահի թեկնածուն առաջադրվել է Հայաստանի իշխող կուսակցության կողմից, ընդդիմադիր խմբակցության ղեկավարը պատասխանեց, որ նախագահի թեկնածու Արմեն Սարգսյանը ցուցադրական հայտարարություններ է անում, որ չի պատրաստվում նախագահի պաշտոնում ինչ-որ մեկի խամաճիկը դառնալ:
«Նա սա նշեց նաեւ մեզ հետ հանդիպման ժամանակ: Իսկ ահա, թե իրականությունն ինչպիսին կլինի՝ կապրենք կտեսնենք: Ցանկացած դեպքում մեր դիրքորոշումն, ըստ էության, դրանից չի փոխվի»,- ընդգծեց Փաշինյանը: