Իրանի նկատմամբ պատժամիջոցների ժամանակահատվածում նաեւ Հայաստանն է հայտնվել դժվարին կացության մեջ: Այս մասին, այսօր՝ փետրվարի 12-ին, Երևանի պետհամալսարանի Միջազգային հարաբերություններ ֆակուլտետում իրանագիտության դասասենյակի բացման արարողությունից հետո լրագրողների հետ զրույցում նշել է Հայաստանում Իրանի դեսպան Սեյեդ Քազեմ Սաջադին:
Նրա խոսքով, դեռ ղարաբաղյան պատերազմի ժամանակներից Իրանը քայլեր է ձեռնարկում Հայաստանում խաղաղություն հաստատելու ուղղությամբ:
«Վաղ անցյալից քաղաքական հարաբերությունները մեր երկու երկրների միջեւ շատ լավ են եղել։ Մենք բազմաթիվ հնարավորություններ կարող ենք ապահովել Հայաստանի համար։ Իրանում կա 70 հազարանոց իրանահայ համայնք։ Իրանահայերն Իրանում շատ խաղաղ գոյակցում են այնտեղի մուսուլմանների կողքին, եւ, եթե իրանահայը Հայաստան է գալիս, դժվար է տարբերակել՝ նա Հայաստանի՞ հայ է, թե՞ Իրանի։ Աշխատեք 80 մլն բնակչություն ունեցող Իրանի հնարավորություններն ուղղորդել դեպի Հայաստան»,-ընդգծեց դեսպանը: