«Նոր ուժերի ռուխ» կուսակցության առաջնորդ Միխայիլ Սաակաշվիլիին արտաքսել են Լեհաստան, որտեղից նա ապօրինի կերպով ժամանել էր Ուկրաինա: Այս մասին Facebook-ի իր էջում գրել է Պետական սահմանապահ ծառայության պետ Օլեգ Սլոբոդյանի օգնականը, հաղորդում է «112 Ուկրաինա» հեռուստաալիքը:
«Այսօր՝ փետրվարի 12-ին, Պետական սահմանապահ ծառայության զինծառայողները Միգրացիայի ծառայության եւ Ազգային ոստիկանության ներկայացուցիչների հետ Միխայիլ Սաակաշվիլիին տեղեկացրել են իրավասու մարմնի՝ իրեն նախկին բնակության երկիր վերադարձնելու որոշման մասին: Սակայն, ընթացակարգի իրականացման ընթացքում Միխայիլ Սաակաշվիլիի շրջապատից անհայտ անձինք հարձակվել են իրավապահ մարմինների աշխատակիցների վրա: Սահմանապահները ստիպված էին պաշտպանվել եւ ուժ կիրառել», - նշել են ՈւՊՍԾ-ում:
Սլոբոդյանը հիշեցրել է, որ 2017-ի սեպտեմբերի 22-ին Լվովի մարզի Մոստիսկի դատարանը Սաակաշվիլիին մեղավոր է ճանաչել Ուկրաինայի սահմանը ապօրինի հատելու համար: 2018-ի հունվարից Կիեւի Շրջանային վարչական դատարանը մերժել է Սաակաշվիլիին Պետական միգրացիոն ծառայության դեմ հայցի պահանջները՝ իրեն փախստական ճանաչելու մասին: Փետրվարի 6-ին Կիեւի շրջանային վարչական դատարանը նորից չի բավարարել Միգրացիոն ծառայության որոշման դեմ Սաակաշվիլիի բողոքը: Սաակաշվիլին ծառայությանը դիմել էր իրեն փախստական ճանաչելու մասին փաստաթղթերի ձեւակերպումների համար կամ անձի, որը լրացուցիչ օգնության կարիք ունի:
Այսպիսով, վերը նշված դատական որոշումների համաձայն, նշված անձը ապօրինի է գտնվել Ուկրաինայի տարածքում, եւ, հետեւաբար, բոլոր իրավական կանոնների պահպանմամբ, նա վերադարձվել է այն երկիրը, որտեղից եկել է՝ խախտելով ներքին օրենսդրությունը:
Ինչպես հայտնի է, քաղաքական գործիչը այսօր ձերբակալվել է Կիեւի «Սուլուգունի» ռեստորանում:
