Ֆրանսիան պլանավորում է որոշակիորեն ավելացնել իր ռազմական ծախսերը Ռուսաստանի պատճառով: NEWS.am-ի թղթակցի հետ զրույցում նման կարծիք է հայտնել Քաղաքական եւ ռազմական վերլուծության ինստիտուտի ռազմական կանխատեսման կենտրոնի ղեկավար, փորձագետ Անատոլի Ցիգանոկը:
Նրա խոսքով՝ ֆրանսիական ղեկավարության որոշման վրա կարող էր ազդել Սիրիայի տարածքում ռազմական գործողությունների ընթացքում ռուսական ծովային տեղակայման թեւավոր հրթիռների «Կալիբր ՆԿ» համալիրի փորձարկումը: Բացի այդ, փորձագետի կարծիքով, ֆրանսիացիներին գրավել են նաեւ այլ ռուսական զենքեր: «Պարզապես ֆրանսիացիներն այս փորձարկումներին ճիշտ գնահատական չեն տվել: Նրանք համարել էին, որ Ռուսաստանը ցուցադրում է իր ուժը եւ մտադիր է ագրեսիվ քաղաքականություն վարել Եվրոպայի նկատմամբ, սակայն իրականում դա այդպես չէ»,-պարզաբանել է ռազմակն փորձագետը:
Բացի այդ, Ցիգանոկի կարծիքով, Ֆրանսիայի ռազմական բյուջեի կտրուկ աճը կարող է կապված լինել ԱՄՆ նախագահ Դոնալդ Թրամփի՝ ՆԱՏՕ ծախսերը կրճատելու մասին հայտարարության հետ, որը լուրջ հարված էր բլոկին:
Ռազմական փորձագետը հիմնվում է արեւմտյան՝ մասնավորապես, ամերիկյան զինվորականների ու ռազմական փորձագետների գնահատականնների վրա, որոնք պնդում են, որ մարտավարական զենքերի առումով Ռուսաստանին հաջողվել է ԱՄՆ֊ի հետ ռազմական հավասարակշռության հասնել: Սա, Ցիգանոկի կարծիքով, պատճառներից մեկն է այն բանի, Թրամփը ակտիվորեն հանդես է գալիս ԱՄՆ ռազմական բյուջեիի եւ ռազմական ծախսերի ավելացման օգտին՝ պահանջելով Կոնգրեսից բանակին լրացուցիչ միջոցներ հատկացնել եւ սկսել զինված ուժերի զինումը:
Սակայն, ինչ վերաբերում է սովորական սպառազինություններին, այստեղ Ռուսաստանին դեռ չի հաջողվել առաջ անցնել իր արեւմտյան մրցակիցներին: Բացի այդ, ամերիկացիներն ու եվրոպացիներն ունեն էական տեխնոլոգիական առավելություն, որը ապահովվել էր ԽՍՀՄ փլուզման շրջանում:
Հիշեցնենք, որ Ֆրանսիայի իշխանությունները հայտնել էին մինչեւ 2025 թվականը 40 տոկոսով ռազմական ծախսերի ավելացման մասին: