ԱՄՆ-ն մտադիր է լրացուցիչ 200 մլն դոլար հատկացնել Սիրիայում մարդասիրական ջանքերին աջակցելու համար: Այս մասին Քուվեյթում «Իսլամական պետություն» ահաբեկչական խմբավորման դեմ պայքարի կոալիցիայի հանդիպման ժամանակ հայտարարել է ԱՄՆ պետքարտուղար Ռեքս Թիլերսոնը, փոխանցում է «ՏԱՍՍ»-ը:
«Հունվարի ամսվա դրությամբ Սիրիայի մարդասիրական օգնության համար մենք 216 միլիոն դոլար ենք ուղղել, այսօր մենք հայտարարում ենք կայունության ապահովման համար եւս 200 միլիոն դոլարի հատկացման մասին, ինչն առաջնային է Սիրիայի ազատագրված տարածքներում», - ասել է նա:
«Միացյալ Նահանգները կշարունակեն աջակցել Սիրիայում «Իսլամական պետությանը» հակազդելու ռազմական ջանքերին եւ այս համատեքստում կշարունակեն նախապատրաստել տեղական ուժերին»,- ասել է Թիլերսոնը՝ ընդգծելով, որ Վաշինգտոնը անհանգստացած է Սիրիայի հյուսիսարեւմտյան շրջանում վերջին զարգացումներից, սակայն շատ լավ հասկանում է Թուրքիայի՝ անվտանգության խնդիրների վերաբերյալ մտահոգությունները»:
Ըստ նրա՝ միջազգային դաշինքին հաջողվել է ազատագրել Սիրիայում և Իրաքում «ԻՊ»-ի վերահսկողության տակ գտնվող տարածքների 98 տոկոսը, սակայն զինյալները «ձգտում են ապստամբ շարժումներ ձևավորել Լիբիայում, Աֆղանստանում եւ Ֆիլիպիններում»:
