Իրանական կողմն իր կարծիքն ունի Եվրասիական տնտեսական միության շրջանակներում Հայաստանի հետ արդյունավետ համագործակցության առումով եւ հայկական կողմն այդ կարծիքին հարգանքով է վերաբերում, սակայն չի կիսում այն։ NEWS.am-ի թղթակցի հետ զրույցում այսպիսի կարծիք է հայտնել ԱԺ ֆինանսավարկային եւ բյուջետային հարցերով մշտական հանձնաժողովի նախագահ, հանրապետական կուսակցության պատգամավոր Գագիկ Մինասյանը։
Նրա խոսքով՝ Հայաստանը՝ որպես ԵՏՄ անդամի, ունի բավականաչափ մեծ պոտենցիալ Իրանի հետ տնտեսական եւ առեւտրային համագործակցության զարգացման համար. «Հայաստանում Իրանի հետ սահմանին բացվում է «Մեղրի» ազատ տնեսական գոտին։ Եվ ես կարծում եմ, որ դրանից հետո կհայտնվեն լրացուցիչ լծակներ Եվրասիական տնտեսական միության շուկաներում իրանական արտադրանքների հայտնվելու համար», - պարզաբանել է Մինասյանը։
Պատգամավորի խոսքով՝ ազատ տնեսական գոտու բացումը պետք է լրացուցիչ ազդակ ծառայի Թեհրանի համար ԵՏՄ հետ համագործակցության ակտիվացման համար, որը կնպաստի իրանական ապրանքների առաջիկա արտահանմանն այդ շուկա։ Դա, պատգամավորի համոզմամբ, բխում է հենց Իրանի շահերից, որը պետք է օգտվի այդ հնարավորությունից։
Պատասխանելով այն հարցին, արդյոք իրանական ապրանքները եւ իրանականա ծագման արտադրանքը համապատասխանում է ԵՏՄ չափանիշներին՝ Մինասյանը նշել է, որ որոշ իրանական ապրանքներ չեն կարող համապատասխանել ԵՏՄ պահանջներին, իսկ որոշներն էլ կհայտնվեն ԵՏՄ անդամ երկրների խանութների դարակներում։
Հիշեցնենք, որ Երեւանի պետական համալսարանի Միջազգային հարաբերությունների ֆակուլտետում իրանագիտության լսարան բացման արարողությանը ՀՀ-ում Իրանի արտակարգ եւ լիազոր դեսպան Սեիդ Քազեմ Սաջադին հայտարարել է, որ իրանական կողմը չի նկատել Հայստանի ԵՏՄ-ի անդամակցության շոշափելի արդյունք։