«Սասնա ծռերի» գործով հանրային պաշտպանների ներգրավվումը ապօրինի որոշում է: Այս մասին NEWS.am-ի հետ զրույցում ասաց գործով փաստաբան ներգրավված Երվանդ Վարոսյանը:
«Բոլորիս համար ակնհայտ է, որ «Սասնա ծռերի» խմբի բոլոր անդամների համար ներգրավվելու են հանրային պաշտպաններ եւ այդ որոշումը վաղուց է կայացված: Դա ակնհայտ ապօրինի որոշում է, անձի կողմից ընտրված պաշտպանի առկայության պարագայում հանրային պաշտպանի գրասենյակի ռեսուրսը նման կերպ օգտագործելը չի կարող լինել օրինական, անտրամաբանական է, որ մեկ անձին միաժամանակ պաշտպանեն եւ հանրային պաշտպանը, եւ նրա օրինական պաշտպանը»,- ասաց փաստաբանը:
Երվանդ Վարոսյանը հավելեց, որ Սահմանադրական դատարանի կողմից հանրային պաշտպանների ներգրավվման մասին որոշման կայացումը, իրականում, քաղաքական որոշում է:
«Հաշվի առնելով ՍԴ-ի կողմից նախօրեին կայացված որոշումը, ապա այո, գործ ունենք քաղաքական որոշման հետ: Հանրային պաշտպանի առկայությունը ընդամենը իմիտացիա է ստեղծում, որ տեսեք՝ ամբաստանյալի իրավունքները պաշտպանում ենք»,- ասաց պաշտպանը:
Նշենք, որ օրերս Սահմանադրական դատարանը որոշում էր ընդունել, որ հանրային պաշտպնի գտնվելը դատարանի դահլիճում օրինական է:
Հիշեցնենք, որ այսօր «Սասնա ծռերի» գործով դատական նիստի ժամանակ, երբ փաստաբանները գործադուլի պատճառով չէին ներկայացել, նախագահող դատավոր Մեսրոպ Մակյանը որոշեց հաջորդ դատական նիստին հանրային պաշտպաններ ներգրավվել: