Լրագրող Քսենիա Սոբչակը ՌԴ Գերագույն դատարան է դիմել նախագահական ընտրություններում Վլադիմիր Պուտինի թեկնածության գրանցումը չեղյալ հայտարարելու պահանջով, գրում է Meduza-ն՝ վկայակոչելով նրա մամուլի քարտուղար Քսենիա Չուդինովային:
Սոբչակը, ով նույնպես առաջադրվել է 2018-ի մարտի ընտրություններում ամենաբարձր պետական պաշտոնի համար, նշում է, որ Վլադիմիր Պուտինը «իրավունք չունի առաջադրվել եւ գրանցվել որպես Ռուսաստանի Դաշնության նախագահի թեկնածու», քանի որ արդեն երեք անգամ զբաղեցրել է այդ պաշտոնը:
Հայտարարության մեջ նշվում է, որ 2012 թվականին Պուտինը Դմիտրի Մեդվեդեւի հետ պայմանավորվել է «ՌԴ նախագահի պաշտոնի ժամանակավոր զիջման մասին ` որոշակի ժամկետից հետո այն վերադարձնելու պարտավորությամբ»:
Սոբչակի հայցով դատական նիստը նախատեսված է փետրվարի 16-ին, հաղորդում է «Ինտերֆաքսը»: ԿԸՀ-ն ասել է, որ նախագահական ընտրություններում Վլադիմիր Պուտինի մասնակցության համար արգելքներ չկան:
