Իրական գնաճը, որ իրենց մաշկի վրա զգում են քաղաքացիները, մոտավորապես 10 անգամ ավելի մեծ է, քան պաշտոնապես հայտարարվածը: Այս մասին Facebook-ի իր էջում գրել է ԱԺ «Ելք» խմբակցության ղեկավար Նիկոլ Փաշինյանը:
Նա տեղեկացրել է, որ այսօր՝ փետրվարի 15-ին, ԱԺ Տնտեսական հանձնաժողովի նիստում ներկայացնելու է փետրվարի 16-ին կայանալիք ԱԺ արտահերթ նիստում քննարկվող Հարկային օրենսգրքի փոփոխությունների նախագիծը: Նշենք, որ այն վերաբերում է թանկացումներին:
«Չափազանց հետաքրքիր նիստ է սպասվում, որտեղ կփորձեմ ապացուցել, որ իրական գնաճը, որ իրենց մաշկի վրա զգում են քաղաքացիները, մոտավորապես 10 անգամ ավելի մեծ է, քան պաշտոնապես հայտարարվածը», - նշել է է Փաշինյանը:
Ավելի վաղ NEWS.am-ը հայտնել էր, որ «Ելք»-ի նախաձեռնությամբ թանկացումներին նվիրված ԱԺ արտահերթ նիստ է կայանալու: Արտահերթ նիստի պահանջով ստորագրահավաքին միացել էր նաեւ «Ծառուկյան» խմբակցությունը, ինչն էլ թույլ էր տվել հավաքել անհրաժեշտ 27 ստորագրությունը:
ՀՀԿ խմբակցության ղեկավար Վահրամ Բաղդասարյանը այս առնչությամբ հայտարարել է, որ իրենք չեն բոյկոտի եւ չեն տապալի նիստը, այլ կմասնակցեն եւ եւս մեկ անգամ կներկայացնեն իրենց փաստարկներն ու հիմնավորումները:
