Կանադան կմիանա ՆԱՏՕ-ի ռադիոլոկացիոն հայտնաբերման և կառավարման AWACS ծրագրին, որից դուրս էր եկել 2011 թվականին: Այս մասին ասվում է Կանադայի ազգային պաշտպանության նախարարության հաղորդագրության մեջ, փոխանցում է «ՏԱՍՍ»-ը:
«ՆԱՏՕ-ն Կանադայի քաղաքականության անկյունաքարն է միջազգային անվտանգության ոլորտում, եւ այսօր կառավարությունը հայտարարել է, որ մտադիր է միանալ դաշինքի AWACS ծրագրին»,- հայտնել են Կանադայի պաշտպանության նախարարությունում:
Հայտարարության մեջ նշվում է, որ վերջին շրջանում ՆԱՏՕ-ն իր օպերացիաներում զգալիորեն ավելացրել է AWACS համակարգի օգտագործումը, այդ թվում նաև՝ Կենտրոնական եւ Արեւելյան Եվրոպայում, որտեղ Կանադան ղեկավարում է դաշինքի՝ Լատվիայում տեղակայված գումարտակային խումբը: Փաստաթղթում նշվում է, որ Կանադան դուրս է եկել այս ծրագրից 2011 թվականին՝ Ազգային պաշտպանության նախարարության համապատասխան որոշումից հետո:
AWACS համակարգը Հյուսիսատլանտյան դաշինքում ստեղծվել է 1978 թվականին:
