Հայաստանում այսուհետ վաճառվելու է բացառապես սպանդանոցների միջով անցած կենդանական ծագման արտադրանքը: Համապատասխան որոշումը հաստատվել է փետրվարի 15-ին կայացած ՀՀ կառավարության նիստին:
Ծրագիրը ներկայացրել է Հայաստանի Հանրապետության գյուղատնտեսության փոխնախարար Ռոբերտ Մակարյանը: Նրա խոսքով՝ երկրում անհրաժեշտ է 40-70 սպանդանոց ստեղծել՝ մորթման ամբողջ գործընթացը կազմակերպելու եւ հանրապետության տարածքում սպանդանոցները հավասարաչափ բաշխելու համար: Պարտադիր մորթման ներդրման գործընթացը փուլերով կընթանա` ոլորտների սահմանմամբ:
Պետական գնումների շրջանակներում ապրանքների սպառման համար սպանդանոցներում պարտադիր մորթման վերաբերյալ պահանջի կատարման վերջնաժամկետը ուժի մեջ է 2018 թվականի մարտի 1-ից, իսկ մսամթերքի արտադրության (տեղական ծագման հումքի օգտագործմամբ), մսամթերքի արտահանման, հանրային սննդի մայրաքաղաքային եւ մարզային հաստատություններում, ապրանքների վաճառքի եւ իրացման կետերում՝ 2018 թվականի հուլիսի 1-ից:
Այս պահին երկրում 17 սպանդանոց է գործում: Ընդ որում, 30 ձեռնարկատեր դիմել է Սննդամթերքի անվտանգության պետական ծառայությանը սպանդանոցների կառուցման հայտերով: Եւս 7-ին տարածքներ են հատկացվել Փոքր եւ միջին ձեռնարկություններին աջակցության ազգային կենտրոնի խորհրդատվական ծրագրի շրջանակներում սպանդանոցների կառուցման համար:
