Կառավարության այսօրվա՝ փետրվարի 15-ի նիստում քննարկվեց ՊՈԱԿ-ներին ձեռնարկատիրական գործունեությամբ զբաղվելու եւ ստացված շահույթն օգտագործելու կարգը հստակեցնելու խնդիրը:
Մասնավորապես, ՀՀ աշխատանքի եւ սոցիալական հարցերի փոխնախարար Արայիկ Պետրոսյանը ներկայացրեց իրենց նախարարության ենթակայության պետական ոչ առեւտրային կազմակերպությունների կողմից իրականացվող ձեռնարկատիրական գործունեության ընթացքում առաջացած շահույթի օգտագործման կարգը սահմանելու վերաբերյալ որոշման նախագիծը:
«ՊՈԱԿ-ների մասին օրենքի համաձայն՝ նրանց գործունեությունից ստացված շահույթը օգտագործվում է իրենց կանոնադրական նպատակների իրականացման համար, սակայն, միեւնույն ժամանակ, ձեռնարկատիրական գործունեությամբ զբաղվելու հնարավորություն տրվում է միայն օրենքով սահմանված լինելու ու հիմնադրամի որոշմամբ ուղղակիորեն նախատեսված դեպքերում», -ասաց փոխնախարարը՝ հավելելով, որ սոցապ նախարարության մի շարք ՊՈԱԿ-ներ հնարավորություն ունեն ձեռնարկատիրական գործունեությամբ զբաղվելու, սակայն, քանի որ հիմնադրամի կողմից այդ ուղղությունները սահմանված չեն, չեն կարողանում իրականացնել:
«Այս փոփոխություններով մենք ուղղակի սահմանում ենք այդ ուղղությունները եւ նրանց հնարավորություն ենք տալիս, որպեսզի կարողանան գործունեություն ծավալել: Սրանով նաեւ սահմանվում է ձեռնարկատիրական գործունեության ընթացքում առաջացած շահույթի օգտագործման կարգն՝ իր ուղղություններով»,-ընդգծեց փոխնախարարը:
ՀՀ վարչապետ Կարեն Կարապետյանը հարցրեց. «Եթե ՊՈԱԿ-ները էդ հնարավորությունն ունեին, ինչո՞ւ ենք իրենց սահմանափակել, երկրորդ՝ կանխատեսում ունե՞ք ինչքան ենք շահույթ ունենալու»:
Ի պատասխան Արայիկ Պետրոսյանն ասաց. «Եղած պայմաններն ու հնարավորությունները լավատեսորեն են տրամադրում, որովհետեւ կան իսկապես անհրաժեշտ պայմաններ»:
Վարչապետն էլ հետաքրքրվեց՝ «ինչքա՞ն լավատեսորեն», ինչին ստացավ պատասխան. «Ժամանակը ցույց կտա»:
«Եթե հիմա խնդիր չեք դնելու իրենց առաջ, ժամանակը ցույց չի տալու: Հասկանալով, թե իրենք ինչ գործառույթներ կարող են անել եւ այդ շուկայի հնարավորությունները հաշվի առնելով, ես առաջարկում եմ՝ իրենց առջեւ դնեք խնդիր, պլան»,-հանձնարարեց Կարեն Կարապետյանը: