Երևանի ընդհանուր իրավասության դատարանի Ավան և Նոր նորքի նստավայրում այսօր՝ փետրվարի 15-ին, դատավոր Արտուշ Գաբրիելյանի նախագահությամբ շարունակվում է «Սասնա ծռերի» գործով դատական նիստը միայն մեկ ամբաստանյալի ներկայությամբ:
Նշենք, որ «Սասնա ծռերի» անդամների պայմանագրային փաստաբանները շարունակում են գործադուլը ևայսօր նույնպես դատարան չեն ներկայացել: Դատավոր Արտուշ Գաբրիելյանը որոշեց նիստը շարունակել միայն հանրային պաշտպանների մասնակցությամբ:
Դատավորը հայտարարեց, որ դադարեցվել են հանրային պաշտպաններ Անուշ Մխիթարյանի և Լուսինե Գալստյանի լիազորությունները:
Դրանից հետո դատարանը որոշեց «Սասնա ծռեր»-ի անդամ Վարդգես Գևորգյանըին դատական նիստերի դահլիճ բերել եւ տեղեկացնել, որ նրան հանրային պաշտպան է տրամադրվում:
Նշենք, որ «Սասնա ծռեր»-ից միայն Արմեն Լամբարյանն է դահլիճում, մնացած 10 անդամի նկատմամբ դատավորը սանկցիա է կիրառել՝ հեռացնելով դատական նիստերի դահլիճից:
Այս պահին մեղադրողն ընթերցում է գործում առկա ապացույցները:
Դատավոր Արտուշ Գաբրիելյանը նկատողություն արեց Արմեն Լամբարյանին, ով զրուցում էր հանրային պաշտպանի հետ եւ ասսաց, որ թույլատրում է խոսել, բայց թող ցածր խոսի, առանց դատը խանգարելու:
Դատաքննությունը շարունակվում է:
Նշենք, որ Արտուշ Գաբրիելյանը քննում է «Սասնա ծռեր» խմբի անդամներ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գեւորգյանի, Կարո Եղնուկյանի և Խաչատուր Գիչյանի առանձնացված մասով գործը: