ԼՂ հակամարտության գոտում պայթյունավտանգ իրավիճակը բոլորի համար ակնհայտ է, դրա վկայությունը 2016 թվականի ապրիլյան դեպքերն են. այդ տեսակետից, հայկական կողմը միշտ պատրաստ է ցանկացած զարգացումների: Այս մասին, այսօր՝ փետրվարի 15-ին, կառավարության նիստից հետո լրագրողների հետ զրույցում նշեց ՀՀ արտաքին գործերի փոխնախարար Շավարշ Քոչարյանը՝ անդրադառնալով ԱՄՆ հետախուզական ծառայության հրապարակած զեկույցին, ըստ որի՝ Լեռնային Ղարաբաղի շուրջ լարվածությունը կարող է վերածվել ռազմական լայնածավալ գործողությունների:
Դիտարկմանը, որ այդ զեկույցում նշվում է նաեւ, որ երկու կողմերի պատրաստակամությունը չկա փոխզիջումների գնալու, Քոչարյան ասաց. «Ինչ վերաբերում է պատրաստ լինելուն, բավական է հիշատակել Ադրբեջանի նախագահի վերջին ելույթը, որը, միանշանակ, ցույց է տալիս, թե ով ինչի է պատրաստ եւ ով պատրաստ չէ բանակցային գործընթացում առաջ գնալուն: Համենայնդեպս, մի բան կարող եմ ասել, որ իր այդպիսի ելույթով Ադրբեջանի նախագահը, նրանց համար, ովքեր դա դեռ չեն նկատել, փայլուն ձեւով, անհերքելի ապացուցեց, որ երբեւիցե չի կարող Ղարաբաղը լինել Ադրբեջանի կազմում եւ որ Արցախի Հանրապետության միջազգային ճանաչումը անխուսափելի է»: