Հասարակությունն ինձանից եւ ձեզանից շատ լավ գիտի, թե որոնք են մեր երկրի առաջնային խնդիրները. պետք չի, որ մեկը դրսից կամ ներսից գա ու այդ ախտորոշումներն անի: Այս մասին, այսօր՝ փետրվարի 15-ին, Հայկական բարեգործական ընդհանուր միության գրասենյակում լրագրողների հետ զրույցում նշել է ՀՀԿ կողմից նախագահի թեկնածու առաջարկված ԱՐմեն Սարգսյանը:
Նրա խոսքով, Հայաստանի առջեւ ծառացած խնդիրների ցանկը մեծ է, մեծ է նաեւ հնարավոր լուծումների ցանկը. «Պետք է այդ լուծումներն ի մի բերել՝ սկսած ժողովրդավարությունից, կոռուպցիայի դեմ պայքարից, ինձ համար շատ էական կրթական համակարգի բարելավումից, վերջացրած քաղաքացիական հասարակության ամրապնդմամբ, առանձին քաղաքացի վերաստեղծելով: Մենք շատ անելիքներ ունենք բարեգործական կառույցների հետ: Այսօր Հայաստանում բարեգործական ծրագրերը կանգնած չեն: Այդ ծրագրերն այսօր շատ ավելի գործնական ու արդյունավետ են»,-ասաց Արմեն Սարգսյանը:
Դիտարկմանը, թե կա կարծիք, որ հասարակությունը չի ընդունում Հանրապետական կուսակցությանը եւ այս հանդիպումներով ինքը փորձում է լեգիտիմացնել իր թեկնածությունը, Արմեն Սարգսյանը պատասխանեց. «Ես դեռ թեկնածու չեմ: ես որեւէ կուսակցության անդամ չեմ եւ ակնկալում եմ, որ Ազգային ժողովում, թե դրանից դուրս յուրաքանչյուրն իր ձայնը կտա մարդու, անկախ նրանից, թե ով է առաջարկում թեկնածություն: Ինձ համար պատիվ է, որ նախագահն առաջարկել է իմ թեկնածությունը քննարկել: Չի կարելի հասարակությունը բեւեռացնել՝ ասելով, որ եթե դուք եք առաջարկում թեկնածությունը, ուրեմն մենք դեմ կլինենք»: