Հունաստանն այլեւս չի հանդուրժի Թուրքիայի սադրիչ պահվածքը եւ Իմիա կղզիների հունական պատկանելությունը կասկածի տակ դնելու փորձերը, հայտարարել է Հունաստանի ազգային պաշտպանության նախարար Պանոս Կամենոսը Բրյուսելում ՆԱՏՕ-ի պաշտպանության նախարարների խորհրդում, փոխանցում է «ՌԻԱ Նովոստի»-ն:
«Այսօր վաղ առավոտյան ես հնարավորություն եմ ունեցել հանդիպելու եւ խոսելու ԱՄՆ պաշտպանության նախարար Մեթիսի եւ ՆԱՏՕ-ի գլխավոր քարտուղար Յենս Ստոլտենբերգի հետ, որոնց ես իրազեկել եմ Էգեյան ծովում եւ Իմիայի շրջանում Թուրքիայի վերջին սադրանքի մասին, որոնք հունական ջրատարածքում հունական կղզիներ են: Ես նրանց ապացույցներ եմ ցույց տվել, որոնք հերքում են թուրքական ցանկացած պնդում, թե այս միջադեպն իբր Հունաստանի մեղքով է եղել»,- հայտարարել է Կամենոսը:
Թուրքիան խախտում է հունական եւ եվրոպական ջրատարածքների սահմանները, խախտում է ծովային իրավունքը, եւ ավելի է մեծանում Էգեյան ծովում «դժբախտ պատահարի» հավանականությունը, ասել է նա:
Նրա խոսքով՝ Թուրքիան պետք է այս խաղերը դադարեցնի, ինչպես նաեւ Էգեյան ծովում սադրիչ պահվածքը եւ Թուրքիայի նախագահի խորհրդականների վրդովեցուցիչ արտահայտությունները:
