Միացյալ Նահանգները «կանգնած է ազատ եւ ժողովրդավարական Լիբանանի կողքին»: Այս մասին Բեյրութում հայտարարել է ԱՄՆ պետքարտուղար Ռեքս Թիլերսոնը, հաղորդում է ՏԱՍՍ-ը։
Նա բանակցել է նախագահ Միշել Աունի եւ խորհրդարանի խոսնակ Նաբիհ Բերիի հետ:
ԱՄՆ արտաքին քաղաքական գերատեսչության ղեկավարն այցելել է Բեյրութ իր՝ մերձավորարեւելյան շրջագայության շրջանակներում, որի ընթացքում նա ավելի վաղ եղել էր Եգիպտոսում, Քուվեյթում եւ Հորդանանում:
«Միացյալ Նահանգները սատարում է ուժեղ, կայուն եւ բարգավաճ Լիբանանին», -ասել է Թիլերսոնը: Նա խոստացել է, որ Վաշինգթոնը կշարունակի ռազմական օգնություն ցուցաբերել այս երկրին, որին ԱՄՆ-ն, ըստ Պետքարտուղարի, «ահաբեկչության դեմ պայքարում դիտարկում է որպես ռազմավարական դաշնակցի»:
«Լիբանանի հետ սերտ համագործակցությունը շատ կարեւոր է Միացյալ Նահանգների համար՝ հաշվի առնելով այն, որ երկու երկրները ընդհանուր նպատակներ են հետապնդում», - ասել է նա:
Լիբանանը համարվում է ԱՄՆ կողմից ամենախոշոր ռազմական օգնությունն ստացող 5 երկրներից մեկը։
Նախագահ Աունը շնորհակալություն է հայտնել Թիլերսոնին՝ լիբանանյան բանակին ցուցաբերված օգնության համար,բանակ, որը կարողացել է երկիրը մաքրել ահաբեկիչների բանդաներից։
